Ledrastraat

De Ledrastraat is en wichtige Inkööpstraat in de Ooltstadt vun Nikosia. De Straat geiht vun’n Eleftheria-Platz bi een Kilometer vun Süüd na Noord. De Naam kummt vun dat ole Stadtkönigriek Ledra op Zypern. De Straat weer vun öllers her een vun de wichtigsten Inkööpstraten in de Binnenstadt vun Nikosia. In de Johren 1950 weer se aver ok Schauplatz vun Kämpf twischen Törken un Greken un weer sietdem twischen de Zonen vun Törken un Greken deelt. Dat noorden Enn höört to de Törksche Republik Noordzypern, dat süden Enn to de Republik Zypern. Dorvun hett de Straat sietdem ok ehr Zentrumsfunkschoon en beten an annere Straten verloren.

Ledrastraat

2008 hebbt de ne’e Präsident vun den greekschen Deel vun Zypern, Dimitris Christofias, un de Präsident vun Noordzypern, Mehmet Ali Talat, afmaakt, dat de Grenz dat eerste Maal siet de Johren 1950 apen maakt warrn schall. Klock 9 Oortstiet an’n 3. April 2008 hebbt se de Stratensperr apen maakt un veel Lüüd vun beide Sieden vun de Grenz kemen dat eerste Maal na de je annere Siet röver. Na bi twölf Stünnen weer de Grenz denn aver wedder dicht, denn de Greken seen, dat de Törken nich inhollen harrn, wat se afmaakt harrn. Törksche Sekerheitslüüd schullen sik ut de Gegend weghollen, wat se aver nich daan harrn. Dorvun schull de Grenz nu eerstmal wedder dicht maakt warrn.