Lierken

Lierken (lat. Larix) sün een Gatten ut de Fomilie vun de Fuhrenbööm. See wasst in de Hauptsaak up de noordlik Halfkugel. 2012 wöör de Lierken de Boom vun dat Johr in Düütschland. Dat gift, je na dem man tellt, teihn bet twintig ünnerscheidlik Oorten vun Lierken. All Oorten bi de Lierken sünd sommergröön, dat heet: in'n laten Harvst, bet toon fröhen Winter hin, smiet se eere Nadeln in jedeen Johr af, dat is een vun de groten Ünnerscheid to annere Nadelbööm. Wiederhin hefft de Nadeln ok'n annern Hinstand as bi sünstige Nadelbööm: vun de Twiegen geiht een kotten Wass aff, doran sitt denn een Bünnel vun bet to sößtig Nadeln. De Lierkentappen seht ok nich so lang ut as bi anner Nadelbööm, se sünd mehr kugelig oder wie een lütt Ei. In Europa ward de Lieken bet to veertig Meter hoch, in Amerika ward see ok noch gröter. De Bork süht bi de jungen Lierken sülver-gries ut, ward denn löter gries-bruun un wenn de Boom old is, denn is de Bork rot-bruun bet bruun. De Lierken höört, wie de Fuhren, to de Karnholtbööm, dat süht'n an de tweerlei Farven vun dat Stammholt. De mittler Deel, also de Karn is stark rötlik bet rot-bruun un de büters Deel, also dat Splintholt is mehr geel bet rot-geel. Wiel dat Lierkenholt besünners goot bi fuchtig Weer hölt, nimmt'n dat Holt gern in'ne Nöchte toon Water un an'ne frische Lucht.

Inne Forst ward de Liekenbööm so twüschen 100 un 140 Johr old, denn ward se daal makt. Enkelde Bööm sün ok all 800 Johr old worrn. Dat öllst ut Lierkenholt schnitzde Deel hett'n in'n Moor in Russland funn'n un see meent, dat dat 11.000 Johr old is.