Lodovico Jacobini

Lodovico Jacobini, ok Ludovico Jacobini oder Luigi Jacobini nömmt, (* 6. Januar 1832 in Genzano di Roma dicht bi Rom; † 28. Februar 1887 in Rom) weer Kardinal vun de Röömsch-kathoolsch Kark un Kardinalstaatssekretär.

Lodovico Jacobini, Lithographie vun Adolf Dauthage, 1875

Ludovico Jacobini, Photo mit Ünnrschrift

Leven

Mit 22 Johren wurr Jacobini nah sien Utbillen in dat Seminar vun Albano an‘n 23. September 1854 to’n Preester weeht. Dornah kreeg Jacobini all fröh den Posten vun den Sekretär vun de Kongregatschoon vun de orientalschen Riten. Wiels dat Eerste Vatikaansch Konzil wurr he vun Paapst Pius IX. to’n Ünnersekretär nömmt. An‘n 24. März 1874 wurr he Titularerzbischop vun Thessaloniki De Bischopsweehn kreeg he an’n 24. März 1874 in de Lateranbasilika för Kardinal Costantino Patrizi, Kardinaldekan un Kardinalbischop vun Ostia e Velletri; Mitkonsekratoren weern de Kurienarzbischööp Pietro de Villanova Castellacci un Antonio Rossi Vaccari. An‘n 27. März 1874 wurr he as päpstlich Nuntius an den Wiener Hoff entsandt.

Wappen vun Kardinal Jacobini

Sien winnende Persönlichkeit un sien sellschopplich Talente hemm hüm dor bald beleevt maakt, un he hett dat ok henkreegen, dat he de öösterrieksch Regeeren in de karklich Angelegenheiten so wiet tomööt kommen dee, dat in Öösterriek trotz de nee Karkengesetten jeder Konflikt tüschen den Staat un de röömsch Kurie ut den Weg gahn wurrn kunn. Dorum hett hüm Leo XIII. ok mit de Führen vun de Utglieksverhandlungen mit de preußisch Regeeren beupdragt, de aber 1880 ut verscheeden Grünnen afbraaken wurrn.

An’n 19. September 1879 wurr Jacobini Kardinalpreester mit de Titelkark Santa Maria della Vittoria. An‘n 16. Dezember 1880 nah den Rückträe vun Lorenzo Nina kreeg he dat wichtige Amt vun den Staatssekretär vun de päpstlichen Kurie, is denn aber all an’n 28. Februar 1887 in Rom storven.

Literatur

• Carlo M. Fiorentino: Jacobini, Ludovico. In: Mario Caravale (Hrsg.): Dizionario Biografico degli Italiani (DBI). Band 61: Guglielmo Gonzaga–Jacobini. Istituto della Enciclopedia Italiana, Rom 2003.

Weblinks

• Lodovico Jacobini In: Salvador Miranda: The Cardinals of the Holy Roman Church. fiu.edu, Website vun de Florida International University; afropen an’n 8. Januar 2019.
• Indrag to Lodovico Jacobini up catholic-hierarchy.org; afropen an’n 8. Januar 2019