Louis Victor Stegemann

düütsch Politiker

Ludwig (Louis) Victor Georg Stegemann (* 27. Dezember 1830 in Wittlage; † 30. September 1884 in Bonn) weer en düütschen Jurist, Goodsbesitter un Politiker.

Stegemann is 1830 as Söhn von Dorette, borene Clüver, un den Amtmann Ludwig Victor Stegemann in Wittlage boren. He weer von 1842 bet 1850 op dat Gymnasium in Stood un hett denn von 1850 bet 1853 Juristeree an de Universitäten Heidelberg un Göttingen studeert. He hett 1854 dat eerste juristische Examen maakt un weer twee Johr bi Amtsgerichten. Nadem he den arvten Grundbesitt in Essen övernahmen hett, hett he de praktische Bueree kennenlehrt. He weer noch wedder an de Universität Göttingen, üm sik in de Agrikultur un Chemie wiedertobillen un Vörlesungen in Volksweertschop to hören. Stegemann hett siet 1859 sien Grundbesitt in Essen un Renzelfelde bewirtschaft, den he dör Ankoop noch vergröttert hett.

Von 1878 bet 1881 weer Stegemann för de Natschonalliberale Partei un den Wahlkreis Hannover 6 (Hoya-Veern) Liddmaat von’n Düütschen Rieksdag.[1]

Stegemann hett an’n 7. Juni 1864 Caroline Mathilda Sophie Adelaida Reinbold (17. Februar 1845-18. November 1920) freet. De beiden harrn twee Söhns un twee Döchter: Mathilde (25. August 1865-8. Februar 1942), Theodor (29. Oktober 1866-22. Juli 1945), Bernhard Friedrich Wilhelm Theodor (7. November 1867-1. Juli 1930) un Sophie (* 21. Juni 1872).[2]

Footnoten ännern

  1. Specht, Fritz / Schwabe, Paul: Die Reichstagswahlen von 1867 bis 1903. Eine Statistik der Reichstagswahlen nebst den Programmen der Parteien und einem Verzeichnis der gewählten Abgeordneten. 2. Aufl. Berlin: Verlag Carl Heymann, 1904, Sied 120
  2. http://arch.vortmes.nl/documents/copo-021.pdf