Möhl Noordholt

De Möhl Noordholt is en Windmöhl an’t Süüdenn von dat ole Dörp Noordholt, de as Koornmöhl bruukt worrn is. Se liggt in de Möhlenstraat.

Historie

De ole Möhl, de en Buckmöhl weer, keem 1766 toeerst in de Oorkunnen vör. Se is afreten worrn, nadem 1863 de Möllerfamilie Vollmer en ne’e Galeriehollanner-Windmöhl op de annere Stratensied boot harr. De ne’e Möhl is ut Tegelsteen boot un hett dree Etaaschen, von de twee ünner de Galerie sünd un een dor över. De Möhlenrump is mit Reet deckt. Se harr veer Gäng to’n Mahlen un Schroten. De Möhl is 1875 dör en Blitzslagg afbrennt, denn aver wedder opboot worrn.

Nadem de Möhl in en Storm swore Schadens afkregen hett, schull se 1967 afreten warrn, kunn aver mit private Middels reddt un restaureert warrn. 2002 sünd Kopp un Flögelkrüüz nee maakt worrn. De Möhl is in Privatbesitt un warrt as Wahngebüüd bruukt.