Mahnke-Verlag

De Karl-Mahnke-Verlag is en Verlag in Veern. Vör allen vun Belang is de Mahnke-Verlag för plattdüütsche Theaterstücken.

Historie

Anfungen mit dat Ünnernehmen hett dat 1841 as de Bookbinner Dieter Mahnke anfüng, in Veern Bibeln, Gesang- un Schoolböker to verköpen, de he fertig druckt in Hannover köfft un sülvs bunnen harr. Bald füng he ok an, Schoolbedarf to verköpen. Mit de Tiet harrn Dieter un vun 1875 af an Friedrich Mahnke ehrn Laden to en bedüden pädagoogschen Bookhannel utboot, de good vun dat Lehrerseminar leven dee. 1907 övernehm Karl Mahnke den Laden. Ok sien Broder Hans dee mitarbeiden. Allgemeen warrt nu Lehrmiddel verköfft un ok as 1923 dat Lehrerseminar dichtmaken dee, hett de Laden dat överstahn.

Wichtig weer dat Johr 1909. Mahnke harr veel Schoolmeesters un Seminaristen as Kunnen. So hett he denn ok anfungen de Tietschrift Seminarbote ruttogeven, de vun fröhere Seminaristen för fröhere Seminaristen maakt weer. Dat dee good passen, he müss ja sounso veel na de Scholen in de Ümgegend un kunn so noch beter Kuntakt knüppen. Dat weer also de eerste Saak, de Mahnke as Verlag rutgeven dee. He mark gau, dat bi de Schoolmeesters veel Bedarf weer för plattdüütsche Theaterstücken. Also füng he an, ok de Stücken vun plattdüütsche Schrievers to verlegen. Teihn Johr later harr he al 50 Schrievers ünner Verdrag. En ganz bedüden Wark, dat den Verlag bannig vöranbröcht hett, weer De Etappenhas vun Karl Bunje.

1935 hebbt sik de beiden Bröder Hans un Karl trennt. Hans möök mit dat Geschäft för Lehrmiddel wieder, Karl övernehm den Verlag. 1953 gifft Karl sien Geschäft in’e Hannen vun sien Söhn Friedrich-Karl Mahnke. De Tall vun Schrievers ünner Verdrag liggt nu al bi 120. De Verlääg Quickborn, Hermes un Richter harrn jemehr Afdelen för Theaterstücken oplööst un Mahnke harr ok disse Stücken övernahmen. 1982 övernimmt Friedrich-Karl sien Söhn Dierk Mahnke dat Ünnernehmen.

Weblenken

• Websteed vun’n Verlag (hoochdüütsch)