Marie Dorin-Habert (* as Marie Dorin am 19. Juni 1986 in Lyon) is en ehmalge franzöösch Biathletin.

Marie Dorin 2010

Marie Dorin-Habert leevt in Laval un trainiert in Le Ruisseau. De Studentin start för CO 7 Laux, wo se vun Pascal Etienne traineert wurr. Biathlon bedrifft se siet 2000, siet 2005 hörrt se to den Natschonalkader vun Frankriek. Ehrn internatschonalen Instand geev se 2003 bi Rennen in' Rahmen vun den Junioren-Europacup in Ridnaun. 2004 nehm se in Haute Maurienne eerstmals an en Junioren-Weltmeesterschap deel un wunn mit de franzöösch Staffel (mit Marion Blondeau un Mélanie Droz-Vincent) de Goldmedaille, keem in' Eenzel up den söbenten Platz un wurr Sösste in de Verfolgung. Den Staffeltitel wunn se een Johr later noch mal in Kontiolahti tosammen mit Blondeau un Anaïs Bescond, todem de Bronzemedaille in' Eenzel achter Swetlana Slepzowa un Vita Semerenko. 2006 keem noch en Sülvermdaille in de Staffel (mit Bescond un Pauline Macabies) dorto. Wunnen harr de düütsch Mannschap, de in beid Johren tovör kien Staffel upstellt harr. In dat sülvige Johr is Dorin-Habert bi hör eenzig Junioren-Europameesterschap antreeden. In Langdorf wunn se dorbi mit de Staffel de Bronzemedaille. Hör letzt Junioren-WM leep Dorin-Habert 2007 in Martell. Hier wurr se nich in de Staffel insett, de ditmal vun hör bitherig Staffelpartnerinnen bild wurr. Liekers reck se mit Platz negen in' Sprint un teihn in de Verfolgung goot Ergevnisse.

Siet de Saison 2007/08 startet Dorin-Habert in' Biathlon-Weltcup. Bi hör eerst Rennen, en Eenzel in Kontiolahti, keem se up den 38. Platz. Hör bit dorhen best Ergevnis in en Eenzelrennen reck se kört dornah an sülvig Stäe, as se 35. in de Verfolgung wurr, nahdem se in' Sprint blots up den 51. Platz kommen weer. Hör best Ergevnis reck se bit dorhen mit de Staffel. In Ruhpolding kunn se tosommen mit Marie Laure Brunet, Julie Carraz-Collin un Macabies en för de unerfohren Staffel bannig gooden veerten Platz recken. To Anfang vun de folgen Saison kunn Dorin-Habert bi dat Verfolgungsrennen mit Rang 32 en vöreerst nee best Weltcupresultat recken un eerste Weltcuppunkte sammeln. Dorbi leep se vun den 49. Rang wegen veer fehlerfree Scheeten vör. Dat Enn' weer dat noch nich. In Ruhpolding reck se in' Sprint den 15., in de Verfolgung den 17. Platz. En wiedere Top-20-Platzeeren folg bi de Biathlon-Weltmeesterschapen 2009 vun Pyeongchang, wo Dorin-Habert 18. de Verfolgung wurr, nahdem se in' Sprint noch as 42. de Punkteränge verpasst harr. In' Eenzel belegg se den 33. Platz. Gröttste Erfolg aber wurr de Gewinn vun de Bronzemedaille in dat Staffelrennen, den se mit Brunet, Sylvie Becaert un Sandrine Bailly achter de Staffeln ut Russland un Düütschland recken kunn. Bi de Olympisch Winterspelen 2010 in Vancouver fier Marie Dorin-Habert ehrn bitlang gröttsten sportlichen Erfolg, as se in dat Sprintrennen die Bronzemedaille achter Anastasiya Kuzmina un Magdalena Neuer wunn. Wenig Daag later reck se doröver herut gemeensam mit Becaert, Brunet un Bailly de Sülvermedaille in' Staffelwettbewarf

In de Saison 2012/2013 schaff Dorin-Habert hör bitlang beste Saison, wobi se sössmal Podiumsplatzeeren recken dee. Nahdem de Uptakt in Östersund mit Rang 19. in Eenzel, 38. in' Sprint un 17. in de Verfolgung noch nich ganz so goot leep, wies se in Hochfilzen düütlich upstiegen Form mit den teihnten Platz in' Sprint, Rang söben in de Verfolgung un Platz fiev mit der Staffel. In Pokljuka wurr se denn Fievte in' Sprint, Dart in de Verfolgung un bi swoor Nebelbedingungen Negente in dat Massenstartrennen. Bi weer swoor Witterungsbedingungen wurr Dorin-Habert in Oberhof mit Marie-Laure Brunet, Anaïs Bescond un Sophie Boilley Staffeltweet. In' Sprint verpass se as Veerte knapp dat Podium un wurr Negente in de Verfolgung. In Ruhpolding wurr se wegen hör goot Scheetleistungen Fievte in' Sprint. Nah en dörwussen Weltmeesterschap wurr de Start in dat letzte Saisondrüddel an' Holmenkollen in Oslo beeter. Dorin-Habert wurr in' Sprint Veerte un dornah Tweete in de Verfolgung. Bi den vorolympischen Weltcup in Sotschi wurr se nochmals Sprint-Veerte.

Dorin-Habert is siet Juni 2011 mit den Biathleten Lois Habert verheiraadt. In' September 2014 is se Moder vun en Dochter wurrn.

Bi de Weltmeesterschapen 2015 reck se nich blots hör eerste Goldmedaille bi en WM, sonnern ok hör eersten Weltcupsieg in en Eenzeldisziplin. Ok bi de ansluuten Verfolgung wunn se de Goldmedaille. To'n Uptakt vun de WM wunn se all mit de franzöösch Mixed-Staffel Sülver. In de Staffel wunn se ebenfalls Sülver un weer dormit all vör den Massenstart spoodriekste Biathletin bi disse Weltmeesterschapen.

Weblinks ännern

  Marie Dorin. Mehr Biller, Videos oder Audiodateien to’t Thema gifft dat bi Wikimedia Commons.