Marine Dusser
Marine Dusser (* 22. Juni 1988 in Bourg-de-Péage) is en ehmalge franzöösch Biathletin.
Marine Dusser leevt un traineert in Villard-de-Lans un geiht för den örtlichen Vereen SC Villard de Lans an den Start, wo Thierry Dusserre hör Trainer is. 2003 fung de Studentin mit den Biathlonsport an un hörrt siet 2005 to den franzööschen Natschonalkader. Hör eerst internatschonale Rennen hett se 2005 in' Rahmen vun den Junioren-Europacup in Garmisch-Partenkirchen bestreeden. 2006 nehm se in Presque Isle an hör eerst vun veer Junioren-Weltmeesterschapen deel. Gemeensam mit Marine Bolliet un Laure Soulié wunn se Staffel-Bronze, wurr Negente in' Eenzel, Achte in' Sprint un Elfte in de Verfolgung. In dat folgen Johr reck Dusser in Martell weer good Ergevnisse, keem aber nich in Medaillennähe, hör best Ergevnis bleev Platz 8 in' Sprint. Spoodriekste Junioren-WM wurrn 2008 de Welttitelkämpe in Ruhpolding. Mit Anaïs Bescond un Marie-Laure Brunet wunn se Staffelsülver, dorto Bronze in' Sprint, wurr Negente in de Verfolgung un Achte in' Eenzel. 2009 schaff se kien Top-Ten-Plätze, best Ergevnis weer Platz 11 in de Verfolgung. Mit de Staffel wurr se Veerte. Ebenfalls good Ergevnisse reck se bi de Junioren-Wettkämpe Sömmerbiathlon-Weltmeesterschapen 2008 in Haute Maurienne. In' Sprint vun de Skiroller-Wettbewarfen keem se up Platz 6 un verbeter sück in de Verfolgung up den fievten Platz.
In' Fruen-Beriek geev Dusser to Midden vun de Europacup-Saison 2007/08 in Langdorf hör Debüt. In hör eerst Rennen, en Eeinzel, keem se all gliks up den 17. Platz un in den folgen Sprint schaff se mit Platz 10 ok glieks hör eerst Top-Ten-Platzeeren. To dat Weltcupfinale vun de Saison an' Holmenkollen in Oslo wurr Dusser eerstmals in' Weltcup insett un keem in' Sprint up Platz 56. Dormit harr se sück ok för dat Verfolgungsrennen qualifizeert, wo se sück up Platz 42 verbetern kunn. Dat bleeven aber ok de best Ergevnisse vun hör in disse Wettkampserie. Bi de Biathlon-Europameesterschapen 2009 in Ufa wurr Dusser 20. in' Eenzel, Elfte in' Sprint, Negente vun dat Verfolgungsrennen un mit Bolliet, Marion Blondeau un Sophie Boilley in dat Staffelrennen Veerte.
Dornah kunn se noch eenige Ergevnisse in den IBU-Cup recken, keem aber nich mehr ganz nah vörn.
