Marutei Tsurunen (jap.: 弦念 丸呈, In Katakana: ツルネン マルテイ; * 30. April 1940) is en japaanschen Politiker. He is eerste de Minsch ut Europa un de eerste, de apen togifft, dat he nich vun japaansche Afstammung is, de in’t japaansche Parlament intagen is.

He is as Martti Turunen in Lieksa in Finnland boren. 1967 keem he mit siene eerste Fro as Laienmissionar för de luthersche Kark na Japan. He hett sik later scheiden laten un hett 1974 siene twete Fro kennenlehrt, nu ene Japanerin. He is denn in Japan bleven un hett ok Andrag op de Staatsbörgerschop stellt, de he 1979 kregen hett. Ok sien Naam hett he bi disse Gelegenheit na’t Japaansche ümmodeln laten. He hett as Lehrer för Engelsch in de Präfektur Kanagawa leevt un ok en ganze Reeg Böker, ünner annern Genji Monogatari, in de finnsche Spraak översett.

1992 is he in’n Stadtraat vun Yugawara wählt worrn un hett dor kort later en Book över schreven, dat 青い目の議員がゆく heten dee (översett soveel as Hier kummt en Raatsmann mit blaue Ogen). He weer bet 1995 in’n Raat un weer denn dat eerste Maal Kandidat för dat Huus vun de Rääd in’t japaansche Parlament. He dee aver nich winnen.

2001 hett he noch wedder en Book schreven, dat 日本人になりたい heten dee (Ik will en Japaner warrn). Ok bi de Wahl weer he wedder Kandidat. He hett wedder nich wunnen, weer aver op de Narückerlist. Nadem Kyosen Ohashi ut dat Parlament rutgahn weer, keem Tsurunen an’n 4. Oktober 2002 nee för em rin. Bi de Wedderwahl 2007 hett he denn direkt wedder en Sitt kregen.

Weblenken ännern