Marwan I., (مروان بن الحكم, utspraken marwān ibn al-ḥakam, (* 623; † 7. Mai 685) weer de veerte Kalif vun de Umayyaden (684-685).

Marwan ibn al-Hakam weer toeerst Sekretär unner Kalif Uthman ibn Affan. He hett an en Kriegstog gegen Ifriqiya (648) deelnahmen. As Uthman an'e Siet bröcht wurrn weer, hett he sik toeerst an Aischa siene Sieten gegen Ali ibn Abi Talib stellt. Unner Muawiya I. is he denn to'n Statthöller vun den Hedschas in Medina upstegen. Na den Dood vun Kalif Yazid I. 683 hett he vunwegen upsternatsche Lüde in den Hedschas na Syrien utbüxen müsst. Nadem ok Muawiya II. storven weer, konn he de jungen Söhns vun Yazid I. an'e Sieten schuven un sik mank de Ummayyaden as Throonfolger insetten. So is de Sietenlinie vun de Marwaniden mank de Umayyaden an'e Herrschop kamen.

As he so wiet weer, hett he gegen den Gegenkalifen Abdallah ibn az-Zubair (684-691) Krieg föhrt. In de Slacht bi Mardsch Rahit (Juli 684) hefft de Anhängers vun Abdallah bi Damaskus swaar up'n Dötz kregen. So bleev Marwan de Baas in Syrien un hett dor ok noch Ägypten tokregen. Man de Umayyaden hefft Medina nich in'e Hannen kregen. Marwan I. is al an'n 7. Mai 685 an de Pest storven. He möss dat sien Söhn un Nafolger Abd al-Malik (685-705) överlaten, den Krieg to Enne to bringen.

LiteraturBearbeiten

  • Heinz Halm (Rutg.) (grünnt vun Ulrich Haarmann): Geschichte der arabischen Welt. München 2004. ISBN 3-406-47486-1
  • Gernot Rotter: Die Umayyaden und der zweite Bürgerkrieg. Wiesbaden 1982.