Maurice Herzog

Maurice Herzog (* 15. Januar 1919 in Lyon; † 13. Dezember 2012) weer en franzöösch Bargstieger un Politiker.

Leven un Wark

Maurice Herzog weer 1950 Baas vun de legendär franzöösch Annapurna-Expeditschoon, an de Louis Lachenal, Lionel Terray, Gaston Rébuffat, Marcel Ichac, Jean Couzy, Marcel Schatz un de Dokter Jacques Oudot deelnehmen. Tosommen mit Lachenal stunn Herzog an’ 3. Juni 1950 up den Tipp vun den Annapurna. De beid weern de eersten Minschen, de en Achtdusender klimmen kunnen. Herzog un Lachenal trucken sück dorbi aber swoor Verfreesen to un sünd man blots knapp an’ Dood an den Barg vörbikommen.

Herzog sien Book Annapurna, dat de Geschichte vun dat Bestiegen vertellt, reck en Millionenuplaag.

1962 un 1967 bit 1978 weer Herzog Afordneter in Paris un weer van 1958 bit 1965 Minister för Jöögd un Sport in dat Kabinett vun Charles de Gaulle. In disse Funktschoon weer he denn ok Gaststarter in de Johr 1959 un 1965 bi dat 24-Stünn-Rennen vun Le Mans.

Van 1968 bit 1977 weer Herzog Börgermeester vun Chamonix. Van 1970 bit 1995 weer he Liddmaat vun dat IOC un sietdem bit to sien Dood Ehrenliddmaat. Toletzt leev he in Neuilly-sur-Seine.

Herzog sien heroische Dorstellen vun de Expeditschoon ut dat Johr 1951 wurr all 1956 dör de Publikatschoon vun dat Daagbook vun Lachenal, Les Carnets du vertige, dat Herzog sien Bröer Gérard nah den Dood vun Lachenal upbereitet harr, ergänzt. Disse Daagbookversion wies nu aber markant Ünnerscheeden to de Manuskripten vun Lachenal, de 1996 de sien Söhn funnen hett un de vun den Guérin Verlag to en nee Utgaav vun dat Daagbook bruukt wurrn. Dornah geev dat en Rechtsstriet un Oordeel, dat in de immer weer achterfraagt Rullenverdeelen vun de beid Bargkameraden bi den Kamp mit den Barg de facto de Leesoort vun Louis Lachenal stärken dee. Lachenal schreev, dat he den hööchstriskanten Upstieg blots deswegen fortsett harr, wiel Herzog, de de Tipp um jeden Pries recken wull, sonst alleen wiedergahn weer, wat de sien sekeren Dood bedüüd harr.

Um en utwaagen Dorstellen vun de Expeditschoon un de ünnerscheedlich Charaktere vun de beid Bargstieger is David Roberts in sien Book True Summit gelegen. He rückt insbesünnere ok de Verdeensten vun Gaston Rébuffat un Lionel Terray in’t rechte Lucht.

Utteknungen

• 1978: Groot Golden Ehrenteeken för Verdeenste um de Republiek Öösterriek
• 2008: Grootoffizier vun de Ehrenlegion

Werke

• Maurice Herzog: Annapurna – Erster Achttausender. Ullstein, Wien 1955. Franzöösch Originalutgaav 1951.

Literatur

• Louis Lachenal: Les Carnets du Vertige. Guérin, Chamonix 1996, ISBN 2-911755-01-4.
• David Roberts: True Summit – What really happened on the legendary ascent of Annapurna.Simon & Schuster, New York 2000, ISBN 0-684-86757-5.

Weblenken

• La justice accrédite la thèse de Louis Lachenal sur la conquête de l'Annapurna, Bericht över dat Gerichtsoordeel van’ 21. April 2006 in Le Monde (franzöösch)
• Annapurna-Erstbesteigung gefeiert, Bericht vun dat 50-Johr-Jubiläum vun de Annapurna-Eerstbestiegen in Die Alpen (PDF, 55 kB)
• DNB-Katalog
• Personennaamdatei