Mesrop Maschtoz (oostarmeensch Մեսրոպ Մաշտոց, nah de wetenschuplich Schrievwies Masrop Meštoc'; *um un bi 360 in Hatsik in de armeensche Provinz Taraun, † 17. Februar 440, woll in Valashapar) weer en armeenschen Hilligen un hett dat armeensch Alphabet utfunnen. Up westarmeensch heet he Mesrob Maschdoz (die westarmeensche Schrievwies is aver desülvige as de oostarmeensche).

Bild vun Mesrop in en Manuskript vun 1776

In de Grootstadt Antiochia hett he sik mit de hellenistische Kultur bekannt maakt. Laterhen hett he en Tiet lang in de Stadt Walarschapat as Suldaat in den Deenst vun den König vun Armenien stahn. Man denn is Mesrop Mönk wurrn un in dat Johr 392 is he to’n Preester maakt wurrn. Dortiets geef dat keen Bibel in armeensche Spraak un överhaupt nix, wat up armeensch schreben weer. Dor hett he sik ranmaakt un hett tohopen mit annere kloke Lüe vun de Kark en Alphabet mit 36 Bookstaven för de armeensche Spraak utfunnen. Dorbi hett he ok dat greeksche Alphabet to Grunn leggt. Later hett he denn Delen vun de Bibel in de armeensche Spraak öbersett un mithölp vun sien Bookstaven upschreven.

Babenhen hett he oorntlich mitmaakt, as dat dorüm güng, den christlichen Globen nah Georgien un nah Armenien to bringen. As de Katholikos Sahak sturven weer, hett he in dat Johr 439 sien Amt mit övernahmen.

Sien Schöler Korium hett seggt, he harr ok dat georgisch Alphabet utfunnen, man dat is nich wiß.