Mike Davies

Michael Grenfell „Mike“ Davies (* 9. Januar 1936 in Swansea; † 2. November 2015) weer en britisch Tennisspeler un Ünnernehmer ut Wales.

Karriere as Speler

1960 verlor Davies in Wimbledon tosommen mit sien Landsmann Bobby Wilson dat Finale in de Düppelkonkurrenz gegen den Mexikaner Rafael Osuna un den US-Amerikaner Dennis Ralston in dree Sätzen mit 7:5, 6:3 un 10:8. Darover herut stunn he in de Eenzelfinals vun San José 1958 un Gstaad 1960. In de Johren 1957, 1959 un 1960 weer he in de britisch Rangliste up Platz een führt. Tüschen 1955 un 1960 hett Davies 16 Begegnungen för de britisch Davis-Cup-Mannschap bestreeden. He wunn 15 vun sien 22 Eenzelpartien as ok 9 vun sien 15 Düppelpartien.

Nah sein Intoog in dat Düppelfinale vun Wimbledon nehm Davies en Angebot över 4500 £ pro Johr vun Jack Kramer wohr, dat hüm to'n Profisportler maken dee. Dat stunn in' Wedderspröök to de dormalig Regelungen vun de International Tennis Federation, de in hör Wettbewarfen blots Amateure aber kien Profispeler toleet. Folgerichtig wurr Davies en wiedere Deelnahm in' Davis Cup un bi Grand Slams ünnerseggt. Davies führ fortan mit anner Profispeler eegen Turniere dör un wurr eerst Spreeker vun en fröh Spelervereenigung, de en Vörrieder vun de hüüdig ATP weer. Ok dat Vermarkten vun de Profiturniere hörr to sien Upgaven.

1967 hett Davies tonächst sien aktiv Loopbahn aflsooten. As in Wimbledon aber af 1968 eerstmals Profispeler tolaaten wurrn, fier Davies en eenmalig Comeback. Tüschen de Championships 1960 un 1968 leegen dormit twalf Grand Slams, de Davies wiels sien Sparr verpasst harr.

Karriere as Ünnernehmer

Nah sien aktiv Loopbahn weer Mike Davies in dat Funktschonärsumfeld tätig. So wurr he vun de fröh World Championship Tennis-Tour ünner Verdrag nommen, as deren Geschäftsführer he 13 Johr lang wark. Hüm sünd völ Innovatschonen un Neeregelungen rund um den Tennissport totoreken, um den Sport to moderniseeren. Dorto tellen etwa farvige Speelbäll un de Inführen vun den Tie-Break. Sien gröttste Spood weer en Feernseh-Verdrag mit NBC, de Tennis eerstmals den breet Massen in't Feernsehn togänglich maaken dee. Van 1981 bit 1984 hett Davies för de ATP as Geschäftsführer arbeit un führ de vun en dicht bi liggen Bankrott hen to en hannelnsfähigen Verband. Af 1987 hett Davies för de ITF as Marketing Direktor arbeit un teken verantwoortlich för dreemal so völ Sponsorengelder un TV-Innahmen, de de ITF tokommen deen. In disse Tiet grünn he ok den Grand Slam Cup.

1995 gung Davies bi de ITF in de Ruhestand, bleev aber wiederhen Turnierdirekter vun dat ehmalge ATP-Turnier vun New Haven. 2012 wurr Davies för sien Verdeenste um de ATP un de ITF in de International Tennis Hall of Fame upnommen.

Weblenken

• ATP-Profil vun Mike Davies (engelsch)
• ITF-Profil vun Mike Davies (engelsch)
• Davis-Cup-Statistik vun Mike Davies (engelsch)