De internatschonale Modersprakendag warrt elk Johr an’n 21. Februar fiert. Disse Dag schall de Lüüd an dat Hoochhollen von jemehr Moderspraken denken helpen.

Shaheed Minar, dat Monument för de Lüüd de an’n 21. Februar 1952 ehr Leven laten hebbt (Universität Dhaka, Bangladesch)

De Dag geit trüch op den 21. Februar 1952 as in de Tied von de Bengaalsch Spraakbewegung en ganze Reeg Studenten von de Universität Dhaka in Bangladesch bi Protesten för jemehr bengaalsche Moderspraak doodschaten worrn sünd. 1947 weer Pakistan unafhängig worrn. Dat Land bestünn ut twee Delen, West-Pakistan un Oost-Pakistan (wat nu Bangladesch is), de en ganz Stück utenannerliggt. De Zentralregeren harr an’n 21. März 1948 Urdu as eenzige Natschonalspraak von ganz Pakistan fastleggt. Urdu wöör aver vör allen in Oost-Pakistan snackt, in Oost-Pakistan dee de grote Mehrheit Bengaalsch snacken. De Bengaalsch Spraakbewegung dee sik nu billen un wull sik för dat Recht insetten, dat to’n Bispeel op de Universität ok Bengaalsch bruukt warrn dröff. An’n 21. Februar 1952 harr dat denn Protesten in Dhaka geven un se hebbt to en Striek opropen. De Regeren dee en Utgangssperr verhangen, aver liekers geev dat Protesten. Bi de Versöök de Protesten toenn to bringen sünd denn en Reeg Lüüd doodschaten worrn. Disse Vörfall dee de Spraakbewegung eerst richtig vöranbringen. In ganz Oost-Pakistan geev dat denn Protesten un tolest müss de Regeren Bengaalsch densülven Status as Urdu tokennen.

De 21. Februar weer toeerst in Bangladesch as Dag von de Spraakbewegung en besünnern Fierdag. An’n 17. November 1999 hett de UNESCO op Andrag von Bngladesch beslaten, dat an dissen Dag ok internatschonal an de Rechten von de Moderspraken dacht warrn schall. De Dag is 2000 denn toeerst fiert worrn. Mit dat Internatschonale Sprakenjohr 2008 hett ok de UNO-Generalversammlung goodkennt worrn.

Elk Johr an’n Modersprakendag warrt ok de Linguapax-Pries utgeven.