Mona (Jamaika)
Mona is en Stadtdeel von de Stadt Kingston in’n Bezirk Saint Andrew von Jamaika.
Geografie ännern
Mona liggt in’n Oosten von Kingston. Von Kingston sülvs is de Stadtdeel dör de Long Mountains afdeelt, de bet 400 Meter över de See hoog sünd. Twüschen de Long Mountains un dat beboote Rebeed von Mona liggt mit dat Mona Reservoir en See, de üm un bi 35 Hektar groot is.
Dör Mona flütt de Hope River.
De Stadtdelen ümto sünd Hope Pastures in’n Noorden, Papine in’n Noordoosten, Elletson Flats in’n Oosten, August Town in’n Süüdoosten, Beverly Hills in’n Westen un Liguanea in’n Noordwesten.
Historie ännern
De Stadtdeel geiht trügg op en Zuckerrohr-Plantaasch, de de Briten dor anleggt hebbt. Düsse Plantaasch hett Mona Estate heten un hett bet 1908 Zucker produzeert.
In’n Tweten Weltkrieg is 1940 in Mona op 102 Hektar Land (252 Acre) en Flüchtlingslager inricht worrn, in dat Lüüd ut Gibraltar un Joden ut Spanien un Portugal ünnerkamen sünd.
1948 is in Mona dat University College of the West Indies grünnt worrn. Dat güng von de University of London ut un schull Togang to regionale Universitätsbildung in de brietschen Kolonien in de Karibik bringen. 1962 hett düt College egenstännigen Status as Universität kregen un hett denn University of the West Indies heten. Kort vörher, 1960, is al en tosätzlichen Campus in St. Augustine (Trinidad un Tobago) tokamen un 1963 een in Barbados (siet 1967 in Cave Hill). To de Universität höört ünner annern de Norman Manley Law School. Dat Universitätskrankenhuus besteiht siet 1953.
Vondaag is de Stadtdeel vör allen von Universitätsgebüüd präägt.
Weblenken ännern
Koordinaten:18° 1′ N, 76° 45′ W