Mud (Musikgrupp)

Mud (düütsch: Matsch, up plattdüütsch sovöl as "Gubel") weer en britisch Glam-Rock-Band vun de 1970er Johren.

Mud 1974

Bandhistorie

De Grupp wurr 1966 in Carshalton in de engelsch Grafschap Surrey vun de Schoolfrüenden Les Gray, Dave Mount, Ray Stiles un Rob Davis grünnd. Tonächst weer se en vun völ dartklassig, slecht betallt britischen Clubbands, bit se 1972 bi de Plattenfirma RAK Records vun Mickie Most en Verdrag kreeg.

De Produzenten Nicky Chinn un Mike Chapman (Chinnichap) hemm Mud as wiedere Glamrockband neben hör anner spoodriek Produkte as The Sweet un etwa tietgliek Suzi Quatro un Smokie upbaut.

Rock-and-Stomp-Nummern as Crazy, Dyna-Mite, Tiger Feet, The Cat Crept In, Rocket un dat Buddy-Holly-Cover Oh Boy keemen hoch in de europääsch Charts. Tüschen 1973 un 1976 hemm Mud elf Titel in de britisch Top Ten platzeert, in Düütschland gelung disse Spood blots fiev Mal. Weniger bekannt is hör Version vun Glenn Miller sien In the Mood, de 1974 ünner de Bandnaam Dum as Single herutkeem. Nahdem de Tosommenarbeit mit RAK Records un dat Duo Chinn/Chapman Midden 1975 ennen dee (letzte Original-Single up RAK weer One Night), stunn de Grupp ünner annern noch bi Private Stock Records (af L'L'Lucy), RCA Records un Carrere ünner Verdrag. As wiedere Erfolge utbleeven, hett sück de Band 1980 uplööst. Nahderhand hett Les Gray mit völ verscheeden Liddmaaten bit 2004 de Band aber noch an’t Leven hollen.

Gitarrist Robert Berkeley “Rob” Davis (* 1. Oktober 1947) is later as Co-Schriever vun Hits as Groovejet (If This Ain’t Love) (Spiller, 2000) oder Can’t Get You out of My Head (Kylie Minogue, 2001) nochmal bekannt wurrn. Bassist Ray Stiles (* 20. November 1946) is siet 1986 Liddmaat vun de Hollies.

De Singer Thomas Lesley „Les“ Gray (* 9. April 1946) is an‘ 21. Februar 2004 an en Hartinfarkt storven, nahdem he an Krebs krank wurrn weer. An‘ 2. Dezember 2006 is de Slagtüüchspeler Dave Mount (* 3. März 1947) storven.