Muhammad al-Sahhaf

Muhammad al-Sahhaf (arab. محمد سعيد الصحاف Muḥammad Sa^cīd as-Saḥḥāf; * 1940 in Hilla, Irak) weer Butenminister ünner Saddam Hussein un later Informatschoonsminister vun den Irak. He is in den drüdden Golfkrieg dör sien Propaganda bekannt worrn, de so absurd weer, dat keeneen dat glöövt harr.

Sahhaf hett toeerst (so as sien Vadder) Zigaretten verköfft. Man dat hett he na blots een Maand hensmeten. Denn hett he Journalismus studeert un wull Engelschlehrer warrn. He hett mit de revolutschonäre Baath-Partei sympatiseert un is ok Liddmaat worrn. Na de Revolutschoon vun 1968 is he Baas vun den Militärrundfunk warrn. Twee Johren later wurr he denn Baas vun't iraaksch Feernsehn. 1972 hebbt se em rutsmeten wieldat he lever de letzte Runn vun een Ringkamp utsennt harr as en Militärparaad.

Dorna hebbt se em as Diplomat na Indien schickt. In't Butenministerium hett he Karriere maakt un Saddam Hussein hett em denn as Butenminister beropen. Dat bleev he, bet Tariq Aziz em aflöös. He wurr den Informatschoonsminister un dormit is he beröhmt warrn.

In den Krieg hett he jümmers vermellt, wo stark de iraaksche Armee weer un wat se allens tostand kregen harr. He hett allens so dreiht, dat de Irakis goot utsehn hebbt un hett sik sogar Saken utdacht, wo de Irakis Spood harrn. Wat de Amerikaners innahmen harrn, hett he nich vertellt. He hett dat so dull dreven, dat he meist ein komische Figuur wurr un de Press hett smucke Ökelbiller vun em maakt. Dormit hett he sien egen Fangemeen funnen.

Besünners dull weer sien Pressverkloren, wonehm he vertell, dat de US-Suldaten vör den Doren vun Bagdad vunwegen de Stärkte vun de iraaksche Armee so bang weern, dat 'n grote Tall vun jüm dorbi weer, sik dat Leven to nehmen. Dat weer jüstemang to de Tiet as de US-Truppen anfungen harrn, de Stadt intonehmen un dat Enn vun Saddam sien Regime weer blots noch 'n poor Stünnen weg. Sahaf weer noch an't Snacken, dat de amerikaansche Angreep afwehrt weer un dat de Amerikaners verloren hebbt, dor kunn een den Larm vun de Wapen al in den Mikrofonen hören.

Körte Tiet later is he ünnerdükert. An'n 24. Juni 2003 hebbt US-Truppen em opgrepen un verhöört. Aver wieldat he nich op de List vun de meestsöchten Kriegsverbrekern weer, hebbt se em gau wedder freelaten.

In'n Jahr 2005 weer al-Sahhaf bi "Abu Dhabi TV" to sehn un hett en Interview geven. Vundaag leevt he mit sien Familie in de Vereenigten Araabschen Emiraten.

Weblinks

• „Fantasierhetorik“ op rhetorik.ch
• welovetheiraqiinformationminister.com mit velen Originalzitaten (engelsch)