Mull (Eiland)

Mull is en Eiland an de Noordwestküst vun Schottland, dat to Argyll un Bute höört. Dat Zentrum vun dat Eiland is Tobermory. Na den Zensus vun 2001 leevt op Mull 1.841 Minschen.

De Landschop vun dat Eiland in’t Vörjohr

Geografie

Dat Eiland is dat Resultat vun de lange Erosion vun de letzten 30 bet 40 Millionen Johren: Mull besteiht to’n groten Deel ut Basalt. De Rest is Moor. De hööchste Punkt is mit 966 Meters de Ben More.

Historie

Op Grund vun funnene Speerspitzen warrt vermoodt, dat de eersten Minschen in’t 6. Johrdusend v. Chr. op Mull leevt hebbt. In de Steen- oder Bronzetiet hebbt de Inwahners vun Mull ünner annern dat Steenfort Dun Ara boot, een Steenkrink, veer Steenregen, mehr as een Dutz Menhiren un twee Brochs.

In’t 14. Johrhunnert wörr Mull Deel vun de Lordship of the Isles.

Nadem de Lordship in’t Johr 1493 tosamenbraken weer, harr de Klan Maclean de Herrschop op dat Eiland övernahmen, de in’t Johr 1681 vun’n Clan Campbell aflööst wörr.

Hüüt gifft dat op Mull veel Tourismus un dat Eiland is en Twüschenstatschoon för vele Pilgers, de över Mull na Iona reisen doot. Mull is över Fähren mit Oban, Lochaline un Ardnamurchan verbunnen. Vun Mull ut verkehrt Utflogsbööd na de lütten Eilannen Iona un Staffa. Dat Eiland hett mit de Isle of Mull Railway ok en egen twee Kilometers lang Smallspoor-Iesenbahn.

Weblenken

Mull (Eiland). Mehr Biller, Videos oder Audiodateien to’t Thema gifft dat bi Wikimedia Commons.

• Websteed vun dat Eiland (engelsch)

Eilannen vun de Binneren Hebriden

Canna | Coll | Colonsay | Eigg | Iona | Isay | Islay | Jura | Longay | Muck | Mull | Oronsay | Pabay | Raasay | Rona | Rum | Skye | Scalpay | Staffa | Tiree | Ulva