Neenlanne

Neenlanne (hoochdüütsch Neuenlande) is een Oortsdeel vun Bremen.

Historie

Al in dat Jahr 1184 warrt dat in Urkunnen in latiensche Spraak nömmt. Dor heet dat Nova Terra, üm un bi 1200 heet dat denn ok in Urkunnen Nienlande. Dat vörmalig Dörp Neenland is in de tweete Hälft vun dat 12.Jahrhunnert upboot wurrn. Siet 1598 höör dat to Övervieland to un weer een Deel vun de Landkuntreien vun Bremen. 1623 is een Deel vun dat ole Dörp Lehnstedt na Neenlande hento kamen. Dat weer to de Tiet, as de Bremer Neestadt up dat linke Över vun der Werser boot wurrn is. De anner Deel vun Lehnstedt is bi den Boo vun de Neestadt daalslaken wurrn. Later is Neenland tohopensmeten wurrn mit de Streken um dat Bunnendoor to de Landgemeen Neenland-Bunnendoorsteenweg. Vun 1880 af an höör düsse Landgemeen to Kattenesch. Vun 1951 af an weer Neenland een Ortsdeel vun den Stadtdeel Neestadt-Süd. Vun 1979 af an is Neenland een Ortsdeel vun den Stadtdeel un vun dat Ortsamt Neestadt.

Kark

Toeerst höör dat Dörp nah de St.-Martini-Kark in de Ooltstadt to Bremen. As in dat Jahr 1750 de Rabbelnhuser Karken boot wurrn is, keem Neenland to Rabbelnhusen. Man dat weer bannig wiet weg. Dorüm wollen de Neenlanner dor nich blieben un hefft sik in dat Jahr 1772 bi de St.-Pauli-Karken in'e Neestadt anslaten. Een egen Kark hefft se nienich kregen.

Flegerhaven un Autobahn

In de Kuntreien vun't Dörp lä in't 19. Jahrhunnert Land, wat vun dat Militär to'n Scheten bruukt wurrn is. Up düt Land wurr later de Flegerhaven för Bremen boot. An de Kant vun den Flegerhaven sünd de Focke-Wulf-Flegerwarken boot wurrn. Nah den tweeten Weltkrieg is jümmers mehr Hannel un Industrie nah Neenland kamen. De Neenlanner Straten lett vundaag as een Stadtautobahn. De A-281, een Bunds-Autobahn, warrt justament as een Lenk vun den Neestädter Haben nah de A-1 just dör Neenland dörboot.

Inwohners

1813: 103 Inwohners 1862: 3.155 Inwohners (Mit Bunnendoorsteenweg) 1955: 3.655 Inwohners 1979: 7.843 Inwohners 1995: 1.425 Inwohners (Ortsdeelen nee updeelt)