Nicolas Chédeville
Nicolas (le cadet) Chédeville (* 20. Februar 1705 in Serez, in Eure (Département); † 6. August 1782 Paris) is en franzööschen Komponist un Oboenspeeler ween.
Nicolas weer de jungste vun dree Bröer, de leifig up de Musette de Cour speelen konnen. Dat weer en Dudelsack ut de Tied vun dat Barock. In Frankriek in dat 18. Johrhunnert hefft de Lüde dat geern speelt un ok höört.
De beiden annern Bröer sünd Pierre Chédeville (1694–1725) un Esprit-Philippe Chédeville (1696–1762) ween. Na de Mudder ehre Sieten hen sünd de Kinner mit de Familie vun den bekannten Flötenspeeler Jacques-Martin Hotteterre (1674–1763) verwandt ween. He hett jem ok in Paris inföhrt.
Nicolas un Pierre sünd vor dag kamen as Rutgever vun verscheedene Warke, dormank Les Amusemens de Bellone vun 1735, wat en Sammlung vun allerhand Warke för Musette, Vigelin, Flöte un Oboe ween is.
Dat duer nich lang, nadem Antonio Vivaldi sien op. VIII rutkamen weer (dor staht unner annern De veer Johrstieden in), un Nicolas hett dor unner den Naam vun „Les Saisons Amusantes“ sess Kunzerte för Oboe vun maakt. Wiel he dat ganze noch en pastoralen Ton geven woll, de dormols in Frankriek so geern höört wurrn is, hett he dor umto noch Flöte un Dreihlier mitspelen laten.
Vivaldi sien op. XIII (Il Pastor fido) warrt midderwielen vunwegen sien Stil as en Wark ut Nicolas Chédeville siene Fedder ankeken.