Nicolaus Ruß
Nicolaus Ruß (* wohrschienlich Rostock; † na 1514) weer de Schriever vun dat Boek van dren strenghen. Ruß sien Book hett kene Angaven to Tied un Oort vun’n Druck hatt, is aver wohrschienlich to Anfang de Johren 1480 in Lübeck druckt worrn.[1] Bruno Claussen geiht dor vun ut, dat dat bi Johann Snell druckt worrn is.[1]
Ruß is wohrschienlich in Rostock boren un hett sik an’n 9. Oktober 1477 an de Universität Rostock inschreven. In’n Winter 1479/1480 hett he dor sien Bakkalaureat maakt un 1485 sien Magister. Later hett he woll an de Universität lehrt. Sien Testament is vun 1514, wohrschienlich is he nich lang na disse Tied doodbleven.[1]
Vun sien Boek van dren strenghen sünd twee Stück bet in uns Tied nableven. De doot nu in de Universitätsbibliotheken vun Rostock un Uppsala liggen. Dat Book is en Översetten vun Delen vun Jan Hus sien Schriften.[2] Wohrschienlich sünd de Böker wegen den ketterschen Inholt inkuhlt worrn, de beiden Böker in Rostock un Uppsala wiest Sporen dorvun, dat se mal dörnaat sünd.[1]