Nihon Hidankyō
Nihon Hidankyō (jap. 日本被団協, Afkörten vun 日本原水爆被害者団体協議会 Nihon gensuibaku higaisha dantai kyōgikai), in engelsch Eegenöversetten Japan Confederation of Atomic and Hydrogen Bomb Sufferers Organizations, is en japaansch Freedensorganisatschoon, de sück gegen de nukleare Uprüsten in de Welt insett. Se versteiht sück vör allen as eenzige natschonale Organisatschoon för de Överlevenden vun de Atombombenabwürfe up Hiroshima un Nagasaki to’n Enn’n vun den Tweeten Weltkrieg, de as „Hibakusha“ betekent wurrn. De Liddmaaten stammen ut all japaansch Präfekturen. De Organisatschoon kreeg 2024 den Freedensnobelpries tospraaken.
Geschichte
ännernNihon Hidankyō wurr an’n 10. August 1956 vun Senji Yamaguchi in Tokio grünnd, mit dat Teel, de Interessen vun den Bedrapenen vun de Atombombenabwürfe to vertreeden. Yamaguchi sülvst hett an’n 9. August 1945 as 14-johrig Arbeiter in en Wappenfabrik vun Mitsubishi in Nagasaki starke Strahlenverbrennungen erleeden, de sien Gesicht blievend entstellt hemm;[1] he is 2013 storven.
To de Teelen vun de Organisatschoon hörrn vör allen de Insatz gegen en nuklearen Krieg as ok de Vernichtung vun all nuklearen Wappen un dat en internatschonal Verdrag to de Ächtung vun Atomwappen ünnerschreven wurrd. Buterdem fordert se en staatliche Entschädigung för de Opfer un Schäden vun de Atombombenabwürfe un begrünnd dat dormit, dat de Staat sück an den Weltkrieg bedeeligt hett un dormit Schäden dör de Bombardeeren to verantworten hett. Sluutend fordert se en Sekern vun den Schuul un Ünnerstütten vun de Hibakusha, vun de dormals noch mehr as 300.000 in Japan un völ wiedere in Korea un anner Deelen vun de Welt leeven deen. För dat 2024 wurr vun dat japaansch Gesundheitsministeriums faststellt, dat dat Dörsnittsöller vun de levend Hibakusha 85,58 Jahre betroog un dat dat in’n März 2024 dorvan noch 106.825 in Japan leven deen, de to’n gröttsten Deel in Hiroshima (51.275 Personen) un Nagasaki (25.966 Personen) keemen.[2]
2005 harrn de Nihon Hidankyō un Senji Yamaguchi all to de Favoriten för den Freedensnobelpries hörrt, kreegen hüm aber nich.[3][4] 2024 wurr de Organisatschoon de Pries denn doch noch tospraaken.[5]
Weblinks
ännern- Website vun Nihon Hidankyō (englisch)
Enkeld Nahwiesen
ännern- ↑ Senji Yamaguchi. In: The Daily Telegraph. 8. August 2013, afropen an’n 11. Oktober 2024 (engelsch).
- ↑ 日本放送協会 – NHK: 全国の被爆者 平均85.58歳に 団体の活動は2世へ引き継ぐ動き. In: nhk.or.jp. 1. Juli 2024, afropen an’n 11. Oktober 2024 (japaansch).
- ↑ Friedensnobelpreis: Heftige Kritik an Auszeichnung für El-Baradei und IAEA. In: Der Spiegel. 7. Oktober 2005, ISSN 2195-1349 (spiegel.de [afropen an’n 11. Oktober 2024]).
- ↑ André Anwar: Friedensnobelpreis – El Baradeis großer Moment. In: Focus Online. 12. November 2013, afropen an’n 11. Oktober 2024.
- ↑ Nihon Hidankyo – Friedensnobelpreis: Friedensnobelpreis geht an japanische Anti-Atomwaffenorganisation. In: zeit.de. 11. Oktober 2024, afropen an’n 11. Oktober 2024.