Normandie (Schipp, 1935)

De Normandie weer en franzöösch Passageerschipp vun de Compagnie Générale Transatlantique (CGT oder French Line), de 1935 in Deenst kamen is. Se weer dat gröttste Schipp in de Welt, as se 1935 rutkeem; un hett mehrere Malen dat blaue Band dragen. Bet hüüt gellt se as en Mielensteen vun dat Passageerschippbo vunwegen ehr besünnern Rumpform un ehr Art-Deco-Stil. Faken warrt se beschreven as dat „perfekte Passageerschipp“. Ehr Design is en wesentliche Grundlaag för dat Opboen vun aktuellen Ozeanliners as de Queen Mary 2.

De Normandie in 1938.

Geschicht

Dat Schipp worr 1932 to Water laten in Saint-Nazaire in Frankriek un weer fardig in 1935. Se droog dat blaue Band op ehr eersten Reis dörch den transatlantischen Ozean, op de Linie twüschen Le Havre un New York. Mit de Queen Mary hett se mehrere Malen dat blaue Band verloren un wedder wunnen. De beid Scheep weren johrenlang de gausten Scheep in'e Welt, man ennlich weer de Queen Mary dat Gauste vun de beiden. Na dat Utbreken vun den tweeten Weltkrieg worr dat Schipp vun de amerikaansche Marine beslagnahmt un in en Truppentransporter ümboot. Se kreeg en ne'en Naam, USS Lafayette (AP-53).

Wieldes dat Schipp an't Ümboen weer, brook en Füer in dat Schipp ut, vunwegen Funken vun en Sniedbrenner. Dat Schipp känter un sunk an de New York Passenger Ship Terminal. Dat Schipp scheen to düer to renoveren un 1946 worr se afwrackt.