Nosing-Glas

En Nosing-Glas (vun engelsch nose „Nees“; ok tasting-glas vun engelsch taste „Smack“) is en sünner’t Drinkglas to’n Verkosten vun Snaps. Traditschonell warrt Nosing-Gläs bi’t Verkosten vun Single-Malt-Whisky insett. Ennige Lüüd bruukt disse oort vun Gläs aver geern ok as normal Drinkglas to’n Geneet vun nich-vermischten Snpas as Kunjak, Armagnac, Calvados, Brandy, Tequila oder Rum.

Nosing-Glas för Whisky

Whisky-Proov in en Nosing-Glas

Vun de Form her sünd Nosing-Gläs to verglieken mit Sherrytulpen, faken aver ok mit en brederen Buuk. Dordör kann sik dat Aroma in’n Buuk vun’t Glas utbreden und warrt dör de na baven hen smallere Form beter na de Nees föhrt. De Fletigkeit kann in dat Glas licht swenkt warrn. Dordör kann sik dat Aroma beter feesetten, liekers warrt dorbi ok mehr Alkohol afgeven, wat de fienen Nuancen överdecken kann. Dat dünne Glas is ahn Klöör, wat dat Inordnen na Klöör un dat Bewerten vun de Viskosität vun den Snaps lichter maakt.

Single-Malt-Whisky warrt normalerwies mit en Temperatur drunken, de ’n beten ünner de Ruumtemperatur liggt. Dör dat dünnwannige Glas kann de Whisky in’n Vergliek to’n Tumbler goot mit de Hand anwarmt warrn. Bi’n Kunjak hett sik dat smalle Nosing-Glas inwtüschen ok gegen den Kunjakswenker dörsett. In Frankriek is dat Nosing-Glas dorför al lang begäng. Dör den längeren Stil vun dat Nosing-Glas kann hinnert warrn, dat sik de Kunjak in de Hand to dull opwarmt. Butendem gaht weniger Aromastoffen verloren, vunwegen dat dat Nosing-Glas na baven smaller is.

Lütte Gläs to’n Verkosten warrt ok bi Wienproven insett. Hier snackt man aver eher vun Proov- oder Degustatschoonsgläs.

Wegen de Egenschoppen vun dat Nosingglas warrt gröttere Nosing-Gläs mehr un mehr ok to’n Verkosten vun sünnere Beersorten bruukt. Tomeist för Beer mit Alkoholandelen över acht Prozent.

Literatur

• Jon van Altenaar: Sammelsurium für Männer. mvg-Verlag, Heidelbarg 2007, ISBN 978-3-636-06311-3, S. 133.