Ole Borg von Hullnst

De Ole Borg von Hullnst is en Siedlandborg ut dat 9. Johrhunnert. De Borg hett blots en poor Johrteihnten lang bestahn. De rekunstrueerte Borgwall is vondaag en Butensteed von dat Archäoloogsche Museum Hamborg.

Westen Deel von de Anlaag

Oosten Deel von de Anlaag

Laag

De Borg liggt op en Höögd von 10 m över NN üm un bi een Kilometer in’n Süden von Hullnst un en beten mehr as een Kilometer in’n Noordoosten von Makensbrook an dat Westöver (dat linke Över) von de Eest op en sannige Landtung. Güntsied de Eest liggt de Münn von’n Rollbeek.

Utgravungen

In de Tied vör 1968 weer de Borg as sieden Wall mit en Graven rundrüm in’t Gelänn to sehn. In dat Johr hett de Pächter von dat Grundstück denn anfungen, dor Fischdieken antoleggen. He harr al en groten Deel von de noorden Halv un den Westdeel von de Anlaag inebent, as en Reddungsgravung anlopen is. Dat Gelänn is dorför dröögleggt worrn. Von den olen Wall weren blots noch 40 Meter intakt, de dokmenteert warrn kunnen. To de Tied weren blots noch en Stück Wall in’n Süüdosten un en Stück Graven in’n Süden nableven, an de de Anlaag genauer ünnersöcht warrn kunn. De Gravungen weren swoor, von wegen, dat jümmer wedder Grundwater indrungen is un ok de Eest fakener Hoogwater harr.

Üm dat Gelänn to schulen, hett 1970 de Stadt Hamborg dat köfft.

1980 is de Anlaag rekunstrueert worrn. Dorto sünd Wall un Graven wedder so anleggt worrn, as se in de Tied weren, nadem de Borg opgeven worrn is. De Delen ut Holt un Steen sünd nich rekunstrueert worrn.

Vondaag steiht in’n Binnendeel von de Anlaag en Infotafel över de Borg un de Gravungen. In’n Juni 2011 sünd in’n Binnendeel von Schoolmeesters un Schölers von de Eestdaalschool in Hullnst tohoop mit’n Heimat- un Verkehrsvereen Eestdaal en Buurngoorn un en Flechttuun anleggt worrn.

In’n Harvst 2014 hett dat noch wedder Utgravungen dör Jochen Brandt von dat Archäoloogsche Museum Hamborg geven.

Rekunstrueerten Opbo

Dör de Schadens, de de Anlaag al harr, kunn de Opbo blots vaag rekunstrueert warrn. Dat weer en Wallborg mit en Binnendörmeter von 80 Meter, üm de en lütt Graven rümgüng. De Butendörmeter mit Graven weer 120 Meter. De Wall weer acht Meter breed un bet to veer Meter hoog. He bestünn ut Holt un Eer un weer op beide Sieden mit Heidplaggen verblennt. De Böschungen weren mit Faschinen ut Holtplöck un Flechtwark sekert. De Kroon von’n Wall bestünn ut en 340 Zentimeter hoge Holtpallisaad. Von binnen weer de Pallisaad bet op de Höögd von de Bost mit Sand anschüddt un mit Feldsteen befestigt. Tosätzlich geev dat in de Binnensied von’n Wall Holtgebüüd in de Oord von Kasematten, de 330 Zentimeter deep weren. De Holtgebüüd harrn en Dack ut Plaggen, dat op de Feldsteen von’n Wall opleeg.

Binnen den Wall legen en poor Gebüüd, de so veer bet fiev Meter breed un 16 oder mehr Meter lang weren. De Togang weer wohrschienlich in’n Westen. Dor lööp en Bahlenweg langs un dor sünd en Reeg Weegsporen funnen worrn. Dat Door sülvs kunn nich seker nawiest warrn. Dat weer aver natowiesen, dat de Holtköhlenschichten in’n Westen von’n Rest von’n Wall afwiekt. Direkte Henwiesen op en Brügg över den Borggraven hett dat ok nich geven. De eenzige indirekte Henwies weer en för de Ümgebung temlich groten Feldsteen,de villicht as Oplager för de Brügg deent hett.

Historie

Na de dendrochronoloogschen Ünnersökungen von Jochen Brandt 2014/2015 is de Borg in dat Johr 892 anleggt worrn. Ünnersökungen vörher an 90 Proben von dat Holt, dat funnen worrn is, weren nich mööglich, von wegen dat de Bööm op extrem fuchte oder extrem dröge Standöörd wussen weren un nich in de vörhannen dendrochronoloogschen Daten intoregen weren.

De Utgräver Claus Ahrens al harr de Borg na de Funnen op dat late 9. Johrhunnert dateert. In de Fränkschen Rieksannalen gifft dat för 804 en Indrag, dat Korl de Grote in Hullnst sien Lager opslahn harr:

Nam imperator super Albiam fluvium sedebat, in loco, qui dicitur Holdunsteti, et missa ad Godofridum legatione pro perfugis reddendis me*dio Septembrio Coloniam venit.

„Denn de Kaiser [Korl de Grote] seet dicht bi de Elv an en Oort, de Holdunsteti nöömt warrt. Un nadem he en Gesandtschop an [König] Godfried [von Däänmark] von wegen dat Rutgeven von Flüchtlinge afsandt harr, güng he in de Midd von’n September na Köln.“

Annales regni Francorum DCCCIIII

Dorüm hett dat ok en Reeg Forschers geven, de meent hebbt, dat de Borg villicht op Korl den Groten trügggeiht. De Borg is dorüm deelwies Korlsborg nöömt worrn. Annere hebbt annahmen, dat de Slaven de Borg in de Tied na 804 boot hebbt, nadem Korl de Grote de Abodriten dat Rebeed von Noordalbingien övergeven hett.

Dör de Ünnersökungen von Jochen Brandt is nu aver wiest, dat de Borg nich von Korl den Groten oder de Slaven boot worrn is. Mööglich is dat, dat de Greven von Stood de Borg anleggt hebbt. En Nawies gifft dat dor aver nich för.

Brandsporen an dat Holt wiest dor op hen, dat de Borg wohrschienlich bi en Brand ehr Enn nahmen hett. In en Gebüüd an’n Wall sünd verfuulte Resten von Koorn un en Deel von en Möhlsteen funnen worrn, wat dor op hendüüdt, dat de Borg noch bewahnt weer, as se afbrennt is. Nadem de Borg afbrennt un verlaten worrn is, is de Wall bilütten erodeert.

Literatur

• Claus Ahrens: Die "Alte Burg" bei Hollenstedt. Helms-Museum – Hamburgisches Museum für Vor- und Frühgeschichte, Informationsblatt Nummer 45, Hamborg 1980
• Claus Ahrens, E. Matthies: Zur Befestigung der Alten Burg bei Hollenstedt. Hammaburg N.F, Nummer 5, 1978-80, ISSN 0173-0886, Sieden 149–161
• Claus Ahrens: Die Untersuchungen an der karolingerzeitlichen Burg bei Hollenstedt, Kr. Harburg in den Jahren 1968-1972, ein Vorbericht. Helms-Museum, Hamburger Museum für Archäologie und die Geschichte Harburgs und dem Museums- und Heimatverein Harburg-Stadt und -Land e.V., in Harburger Jahrbuch Nummer 13, Horborg 1968/1972, ISSN 0722-6055, Sieden 72–104
• Ernst Andreas Friedrich: Die Karlsburg von Hollenstedt, S. 35-36, in: Wenn Steine reden könnten, Band II, Landbuch-Verlag, Hannover 1992, ISBN 3-7842-0479-1

Weblenken

Ole Borg von Hullnst. Mehr Biller, Videos oder Audiodateien to’t Thema gifft dat bi Wikimedia Commons.