Ole Neestadt

De Ole Neestadt is en Ortsdeel in den Stadtdeel Neestadt vun Bremen. De Ole Neestadt is de Deel vun de Neestadt, de al in’t 17. Jahrhunnert achter Wall un Stadtgraben legen hett.

Anfang

An’t Enn vun dat 15. Jahrhunnert weer dat in Bremen klar, dat de Stadt vun de Werserkant her beter schützt weern möß. De Hollandsmann Johann van Rijswijk hett 1601 un 1602 as Eersten dorup henwiest, dat up de lunke Siet vun de Werser afsluuts en Festung henmöß. De eersten Plans hett 1614 un 1615 Rijswijk sien Schöler Johann van Valckenburgh maakt. 1623 güng dat denn mit den Bo los. Valckenburgh harr dat plant, in de Bremer Neestadt Grachten antoleggen, as dat in Hollandsche Städer begäng weer. Man dor is nix vun wurrn, vunwegen dat dat de Bremers to düür düch. Bit 1627 sünd seben Bastionen boot wurrn, 1664 keem de achte un leste up den Stadtwerder hento. Dat ole Dörp Lehnstedt is bi den Boo to’n Deel vun de Neestadt dalslaken wurrn, to’n lüttjeren Deel keem dat denn nah Neenland. De Neestadt hett twee Doren kregen: Dat Hoge Door un dat Bunte Door. Düsse Doren hefft de Bremer Ortsdelen Hogendoor un Bunnendoor jem ehren Namen geben. En Kark is ok boot wurrn. In de Jahren vun 1679 bit 1682 is de St.-Pauli-Karken anfungen un fardigstellt wurrn.

Wie dat fuddergüng

Mit dat Wohnen güng dat in’e Neestadt nich so goot vöran. De Bremers, de dor wohnen döen, harrn bloß en minner Recht, dat Neestadtsbörgerrecht. Eerst 1848 is dat Börgerrecht vun de Neestädters an dat Börgerrecht vun de Ooltstadt angleken wurrn.

Grote Delen vun de Neestadt sünd bit in dat 19. Jahrhunnert Gaarnland bleben. Dor sünd denn grote Plätz un Anlagen vun de Industrie anleggt wurrn, besunners Beerbroereen. Vun 1802 af an sünd de Festungen afbraken wurrn. Up de Neestadt ehr Bastionen hefft de Bremers Scholen un Kasernen boot. De Stadtgrabens hefft se tosmeten. Dor sünd denn Gröönanlagen vun maakt wurrn.

Tweet Weltkrieg un wat denn keem

In den Tweten Weltkrieg sünd de meisten Hüser un Bowarken in de Neestadt tweigahn. Besunners de olen Gebelhüser an’n Neen Markt, an’e Bruutstraten, an’e Oster- un Westerstraten sünd för all Tieden verswunnen. Bowarken in den Stil vun de föfftiger un seßtiger Jahren sünd an jem ehr Stäe träden. De ole St.-Pauli-Kark is in Dutt gahn un nich wedder upboot wurrn. De Bruggen nah de Oolstadt sünd an anner Stäe boot wurrn. De Straten sünd vunwegen den Autoverkehr breder wurrn un dat geef keen Platz mehr för de ole Karken. An den Platz, wo se stahn hett, geiht nu de Friedrich-Ebert-Straten dör, en lüttjeren Deel is hüdigendags de Platz vun dat St.-Pauli-Stift. Een nee St.-Pauli-Kark is an’n ganz annere Stäe in de 1960er Jahren nee boot wurrn. De Industrieanlagen in de ole Neestadt sünd grötter wurrn, as vör den Krieg. De vörmalig Beck’s-Beerbroeree (hüdigendags Inbev), Kraft-Jacobs-Suchard un de Schokolademanufaktur Hachéz produzeert in de ole Neestadt.

Inwohners

1812:7.521; 1862: 12.728; 1889: 23.423; 1939: 11.150; 1950: 3.806; 1961: 5.486; 1974: 5.607; 1995: 5.706 Inwohners in de ole Neestadt.