Olena Pidhruschna

Olena Mychajliwna Pidhruschna (ukrainsch: Оле́на Миха́йлівна Підгру́шна; russisch: Елена Михайловна Подгрушная; * 9. Januar 1987 in Legnica, Polen) is en ukrainsch Biathletin un Politikerin.

duumOlena Pidrushna in dat Johr 2010

Werdegang

Olena Pidhruschna, de för den Vereen Kolos Ternopil an den Start geiht un dor bi Ihor Potschynok traineert, weer all en spoodriek Juniorensportlerin. Hör eerst internatschonal Grootereignis weern de Junioren-Weltmeesterschapen 2004 in' Sömmerbiathlon in Osrblie. Dor weer Platz 12 in' Sprint dat best Ergevnis. In den folgen Winter is se bi de Junioren-WM in Kontiolahti antreeden, wo ebenfalls Platz 12 in' Eenzel dat best Ergevnis bleev. 2005 is se weer bi de Sömmer-Weltmeesterschapen vun de Junioren, dit Mal in Muonio, antreeden un wunn dor Gold mit de Staffel. Dorto keem Platz 11 in' Sprint, 8 in de Verfolgung un 4 in' Massenstart. Een Johr later wunn se in Presque Isle Bronze in dat Eenzelrennen bi de Winter-WM vun de Junioren. Bi de Junioren-Europameesterschap 2006 in Langdorf verpass Pidhruschna as Veerte mit de Staffel en wiederen Medaillengewinn. Ok de Sömmer-Weltmeesterschap leep för hör mit de Sülvermedaille in de Verfolgung nah en fievten Platz in' Sprint weer good. Kien Medaille, aber good Ergevnisse hemm ok de Junioren-Weltmeesterschapen 2007 in Martell brocht. Best Ergevnis weer de sösste Rang in' Sprint. Sülver wunn se mit hör Staffel bi de Junioren-Europameesterschap 2007 in Bansko. As Veerte in' Sprint verpass se en wiedere Medaille un wurr todem Fievte in de Verfolgung un in dat Eenzel. Ok bi de Sömmer-Weltmeesterschap vun de Junioren in Otepää wunn se Sülver in' Sprint un Bronze in de Verfolgung. Hör letzt Junioren-Weltmeesterschap in Ruhpolding verleep weniger spoodriek as de vörherigen. Wat beter verleep de letzte Junioren-Europameesterschap in Nové Město na Moravě, wo Pidhruschna Veerte mit de Staffel un in' Sprint wurr as ok in' Eenzel Platz 7 un in de Verfolgung Platz 11 recken dee.

Hör Debüt bi de Utwussen geev Pidhruschna 2005 in' Biathlon-Europacup. Bi hör eerst Rennen, en Sprint in Windischgarsten, keem se up Platz 18. To'n eersten Mal in den Biathlon-Weltcup is se in de Saison 2006/2007 in Lahti antreeden, wo se Platz 44 in' Sprint un 45 in de Verfolgung belegg. Eerste Weltcuppunkte wunn se as 29. in dat Eenzel bi den Uptakt vun de Saison 2008/09 in Östersund. Hör eersten Weltcupsieg kunn se 2009 in Oberhof mit de ukrainsch Staffel fiern. De eerste Top-Ten-Platzeeren schaff Olena Pidhruschna mit Platz teihn in dat Eenzelrennen bi den Weltcupuptakt 2009 in Östersund. Hör bit dorhen beste Weltcup-Platzeeren weer Rang 7, ebenfalls in Östersund reckt, in dat Sprintrennen. 2009 wunn se mit de ukrainsch Staffel de Goldmedaille, een Johr later weer mit de Staffel de Sülvermedaille.

Olena Pidhruschna nehm an de Olympisch Winterspelen 2010 deel. Hör best Eenzelresultat weer de twalfte Platz in' Massenstart. Mit de Staffel keem se up Platz söss. To'n Uptakt vun de Biathlon-Weltcup Saison 2012/2013 in Östersund kunn Olena Pidhruschna eerstmals en Podestplatz recken. In' Sprint keem se up den tweeten Platz. Dat hett se denn in den wiederen Verloop vun de Saison bi en Verfolgungsrennen achter Tora Berger in Antholz noch mal schafft. Mit söss Top-Ten-Resultaten in 14 Rennen, Rang 33 as dat schlechteste Ergevnis un Rang acht in de Gesamtwertung weer se to de Tiet de beste Biathletin vun hör Land. In Oberhof wunn se an de Siet vun Julija Dschyma, Valj un Wita Semerenko ok noch en Rennen mit de Staffel, in Hochfilzen mussen se sück tovör blots vun Norwegen slahn geeven.

Hör eerst Eenzelsieg gelung hör bi de Biathlon-Weltmeesterschapen 2013, as se vör Tora Berger un Wita Semerenko de Goldmedaille in' Sprint wunn un ansluutend noch Bronze in dat Verfolgungsrennen achter Berger un Krystyna Pałka un Sülver mit de ukrainsch Staffel reck.

In de Saison 2013/14 kemm se blots in de veer Welcupstatschonen to'n Insatz, bi de se in Oberhof eenmal up dat Podest keem. In de Gesamtwertung keem se up letzt up Platz 28. Bi de Olympisch Spelen 2014 wunn se mit de ukrainsch Staffel de Goldmedaille.

In' Toog vun de Umbröök in dat Fröhjohr 2014 in de Ukraine wurr Pidhruschna to stellvertreeden Ministerin för Kultur un Sport vun de Ukraine beropen.

To de Saison 2015/16 keem se weer torüch in' Weltcup. Glieks bi den Uptakt reck se twee Podestplätze un wunn nahderhen den Sprint in Canmore. An' Enn' vun de Saison leeg se up Platz 7 in de Weltcupgesamtwertung. Bi de Biathlon-Weltmeesterschapen 2016 in Oslo weer hör best Platzeeren Platz 5 in de Verfolgung un mit de Staffel, mit de Mixed-Staffel verpass se up Platz 4 en Medaille blots knapp.

To de Saison 2016/17 keem se bi den Uptakt in Östersund in dat Eenzelrennen up den 13. Rang, wat se bi den Sprint in Oberhof mit Rang söben noch verbeetern kunn. Bi de Biathlon-Weltmeesterschapen reck se mit de ukrainsch Mixed-Staffel Platz 5.

All tosommen hett se (Stand 31.12.2016) in hör Loopbahn 7 Weltcupsiege reckt, dorvan 2 Eenzelsiege.

Weblenken

• Indrag in de Datenbank vun de IBU (engelsch)
• Profil up biathlon.com.ua (russisch/engelsch)
• Körtprofil (russisch)