Oswald Kanzler
Oswald Kanzler (* 18. April 1883; † 16. September 1944 in dat KZ Fuhlsbüttel) weer en düütschen Politiker von de SPD.
Kanzler is 1883 boren un hett Former lehrt. Na siene Lehrtied is he op Wannerschop gahn un hett 1905 in de Maschinenfabrik Georg Niemeyer in Bosselbeek anfungen to arbeiden. In’n Eersten Weltkrieg weer he Soldaat. Na’n Krieg is he Vörsitter von’n Bedrievsraad in de Fabrik Niemeyer worrn.
1924 is Kanzler Parteisekretär von de SPD in Horborg worrn. Dat is he bleven, bet de Partei in’n Juni 1933 verbaden worrn is. He is 1926 Börgervörsteher in’t Stadtparlament von Horborg worrn un von 1927 af an in Horborg-Willemsborg. Von 1929 bet 1933 weer he Afornten in’n Provinziallanddag von de Provinz Hannover. Nadem de SPD verbaden weer, hett he as Vertreder för Versekerungen arbeidt.
Na dat Attentat op Hitler an’n 20. Juli 1944 is he an’n 22. August 1944 in de Aktion Gewitter fastnahmen worrn. Kanzler harr dat mit dat Hart un hett in de Haft in’t KZ Fuhlsbüttel sien Medikamenten nich mehr kregen. Een Maand later is he an’n 16. September 1944 doodbleven.
He weer verheiraadt mit Emilie Bademann. An’n 25. Juli 1908 is jemehr Dochter Gertrud boren. De beiden hebbt tohoop ok noch en tweet Kind in Pleeg nahmen, Hans Bademann, de 1912 boren is.
Na Kanzler is siet 1988 de Oswald-Kanzler-Weg in Hamborg-Wilsdörp nöömt. In de Hoppenstedtstraat 53 liggt en Stolpersteen för Kanzler.[1] Sien Graffsteed liggt in’n Ehrenhain för Hambörger Wedderstandskämpfer, den de Geschwister-Scholl-Stiftung op’n Karkhoff Ohlsdörp hett inrichten laten.