Otto Groote

Otto Groote (* 12. Oktober 1957 in Oostrhauderfehn) is en plattdüütschen Musiker.

Groote is 1957 in Oostrhauderfehn boren un dor ok upwussen. Sien Vörollen kwammen ut Nederland, un sien Grootvader un Vader sünd noch rechtschapen Törfarbeiders west. He sülvst hett ok noch as Kind in 't Moor warken musst. Al in de Jahren 1970 un 1980 hett he Folkmusik spöölt. Toeerst noch up Hoogdüüts. Mit 18 Jahr sowat truck he ut sien lüttje Dörp in de grote Freeiheid, na Ollenbörg, wor he düütse (noch kien egen) Texten sungen hett. In de tachtiger Jahren treckt he wieder na Bremen, wor he vandaag noch leven deit. Hier baut he sük en egen Atelier un warkt as Bildhauer, man he is mit sien egen Künst neet recht tofree. Nadeem he en hele Sett gaarkeen Musik mehr maakt hett, fangt he eerst 2003 weer an, to singen, nu in siene Moderspraak Plattdüüts. Nu schrifft he ok egen Texten un kriggt gau Kontakt to 'n Riege plattdüütse Schrieverslü as Detlef Kolze ut Bremerhaven, Jan Cornelius in Jemgum un Gerda Ulpts-Janssen. Vörbiller för Otto sünd de Singer-Songwriter Si Kahn un de Sanger Ian MacKintosh, de 2007 ut de Tied full. Eerst is Otto solo uptreden, man siet Enn 2007 gifft 't dat Otto Groote Ensemble mit Matthias Malcher (Gitarre un Banjo) un Ralf Stromann (Bass). Malcher, de togliek to de Muuskanten van An Rinn hören deit, is ok Produzent van Groote sien Spegelplaten un sien Geleidsmann. Wenn een bedenken deit, dat Otto Groote eerst so körte Tied mit plattdüütse Folkmusik togang is, kann een dat verwunnern. Otto Groote hett sük profileert as Lyriker van Olldagsthemen, sünner dat dat banaal word. - En Volksmuuskant in d' beste Sinn! As al 2008 un ok weer 2009 (un dat sall 'n faste Pahl in de oostfreeske Kulturlandskupp worden) organiseert Otto Groote in de Gulfhoff Ihnen in Engerhaaf dat "Konzert zwischen den Jahren" mit Muuskanten ut Noorddüütsland, Nederland, man ok ut de internationale Folk-Szene.

Diskografie

Bit nuto sünd van hum dree Spegelplaten rutkomen:

• Otto Groote: In ’t blaue Lücht van d’ Nörden. Artychoke 2006
• Otto Groote Ensemble: De Tied steiht still. Kiwi 2007
• Otto Groote Ensemble: De anner Steerns an d' Heven. GMS 2009

• un Otto is ok to hören up de Jubiläums-CD 80 Jahre Hamburger Hafenkonzert,

rutgeven van de NDR to de 80-Jahr-Fier van de ollste Radiosendung in de Welt. G+H Media 2009

Weblenken

• Webstee van Groote (hoogdüüts)
• Webstee bi MySpace van Groote (hoogdüüts)