Pāhoehoe-Lava (hawaiisch pāhoehoe)[1] is en sünnere Oort vun Basalt-Lava, de ut en bannig dünnfletig basisch und gasarm Magma (d. h. mit siete Viskosität) mit Temperaturen vun ruchweg 1100 bit 1200 °C tüügt warrt. De Begreep weer vun Clarence Dutton in de geoloogsche Fackspraak inföhrt[2].

Frische Pāhoehoe-Lava
Reepordige Böverflach vun Pāhoehoe-Lava

In’n Gegensatz to de ʻAʻā-Lava, de ok en Basalt-Lava is, wiest de Pāhoehoe-Lava en teemlcih gladde Böverflach, op de man ok goot lopen kann, wenn de Lava verklaamt is. Wenn de Lavaströöm noch aktiv sünd, kann de Lavadeek bit to 50 cm dick warrn. De hitte Lava warrt an ehr Böverflach toeerst fast, kann dorünner aver noch wieter strömen. De bövere Köst kann in Schören tweibreken, ut’neen rutschen un dorbi Lavakissen billn. Wenn se noch formbor is staut se sik ok op un smitt lütte Lavarüchen op. Wegen ehr Utsehn gifft dat verscheden annere Beteken för Pāhoehoe-Lava, so as Fladenlava, Schollenlava, Strick- oder Reeplava. De Naam „Stricklava“ kummt vun de Form vun de Böverflach, de bi’t wieterströmen vun de Lava tostannen kummt, wenn sik op de Böverflach al en Huut billt, de denn to Rippels tosamenschaven warrt.

Literatur ännern

  • Clarence Edward Dutton: Hawaiian volcanoes. In: U.S. Geological Survey annual report of the director, Vol. 4, 1882/83, Washington 1884, S. 81–219. WorldCat

Borns ännern

  1. Hawaiian Dictionaries
  2. James Furman Kemp: A handbook of rocks for use without the microscope : with a glossary of the names of rocks and other lithological terms. 5. Oplaag, New York: D. Van Nostrand, 1918, S. 180, 240: C. E. Dutton, 4th Annual Report U.S. Geological Survey, 1883, S. 95; Bulletin of the Geological Society of America, Volume 25 / Geological Society of America. 1914, S. 639

Weblenken ännern

  Pāhoehoe-Lava. Mehr Biller, Videos oder Audiodateien to’t Thema gifft dat bi Wikimedia Commons.