Paris Hilton

Paris Whitney Hilton (* 17. Februar 1981 in Nee-York) is en US-amerikaansche Mediengestalt.

Hilton is 1981 as Dochter vun Richard Hilton un Kathy Richards boren. Ehre Familie höört de Hilton-Hotelkeed to. Paris Hilton warrt dor en groten Deel vun arven. 21 Johr oolt hett Hilton anfungen, as Model to arbeiden. Dör dat grote Arv, dat se kriegen warrt, un dör ehren extravaganten Levensstil mit Partys noch un nöcher hebbt de Medien denn groot Intress an ehr funnen. 2000 hett Hilton Fotos för de Magazine GQ un FHM maakt un 2003 mit Nicole Richie de Serie The Simple Life för den Senner FOX opnahmen. Dör ehre arrogante Oort hett se de Menungen scheden un polariseert. Denn düker ok noch en Video op, dat ehr Ex-Fründ Rick Salomon opnahmen harr, un dat de beiden bi’n Sex wiesen dee. Salomon füng denn ok an, dat Video op DVD to verköpen as 1 Night in Paris (Ene Nacht in Paris). Hilton dee Salomon nu verklagen un kreeg Recht. Se schull vun den Gewinn wat afkriegen. All dat Spektakel üm Hilton hett ehr jümmer wedder in de Bläder bröcht. De Lüüd kennen ehren Naam nu, ofschoonst se ans noch nich veel opstellt harr. Allens, wat mit Hilton to doon harr, verkööp sik nu allerbest in de Boulevard-Bläder. 2004 keem en Book vun Hilton rut: Confessions of an Heiress: A Tongue-in-Chic Peek Behind the Pose (Bekenntnisse vun ene Arvin: En ironischen Blick achter de Pose; Tongue-in-Chic is en Woortspeel mit tongue-in-cheek „ironisch“ un chic „schick, modisch“), wat sik ok temlich good verköpen dee. 2005 harr se ene Rull in’n Film House of Wax un 2006 möök se en Musikalbum, dat Paris heten dee un geev de Single Stars Are Blind rut. In’n September 2006 hett de Polizei Hilton faat kregen as se duun Auto föhrt is un se müss ehren Föhrerschien afgeven. In’n Februar 2007 hett de Polizei ehr wedder stoppt, se weer nu nachts ahn Licht ünnerwegens wesen. Ehren Föhrerschien harr se aver noch nich wedder. Hilton müss nu vör Gericht un hett wegen Föhren ahn Föhrerschien 45 Daag Gefängnis kregen. De Straaf is noch wedder op 23 Daag kört worrn, aver an’n 3. Juni 2007 is Hilton in’n Knast gahn.

Dör ehre grote Bekanntheit, Popularität un Polarität verköfft sik allens, woneem Paris Hilton opsteiht. Hilton hett ünner annern en Modelabel, verköfft Smuck, Parfüm un veel annern Kraam, maakt Warf, hett en Nachtklub un en ganze Marketingreeg rund üm ehre Person. Dat se op ene Party kummt, dor mutt de Gastgever meist 100.000 Euro för utgeven.

Filmografie (Utwahl)

Johr	Titel	Synchroonsnacker	Funkschoon
1992	Wishman dt.: Hitch, der Geist aus der Flasche		Dorsteller
2002	Nine Lives dt.: Nine Lives – Haus des Schreckens	Anja Stadlober	Dorsteller
2004	The Hillz		Dorsteller
2005	House of Wax	Anja Stadlober	Dorsteller
2006	Pledge This! dt.: Die Party Animals sind zurück!	Anja Stadlober	Dorsteller Produzent
2003-07	The Simple Life, Feernsehreeg	Anja Stadlober	Dorsteller Produzent
2008	The Hottie & the Nottie	Anja Stadlober	Dorsteller Produzent
2008	Repo! The Genetic Opera		Dorsteller
2009	Rex, Feernsehn		Dorsteller
2010	The Dog Who Saved Christmas Vacation, Feernsehn dt.: Ein Hund rettet die Weihnachtsferien	Anja Stadlober	Stimm

Utteknungen

2004: AVN-Pries (en Pries vun de Erotikindustrie) för „1 Night in Paris“ as: „Titel, de sik opbest verköfft“, „Titel, de dat mehrste Geld maakt hett“ un „Beste Marketingkampanje för en enkelt Projekt“
2005: Teen-Choice-Pries: „Best Schrieg“ in House of Wax
2005: „Leegst antagen Prominente“; wählt vun PETA vun wegen dat Hilton geern Pelt driggt
2006: Gollen Himbeer as leegste Blangendorstellerin in’n Film House of Wax.
2006: Indrag in dat Guinness-Book vun de Rekorde as „opmehrst to hooch inschätzte Persönlichkeit“

Weblenken

Paris Hilton in de Internet Movie Database (engelsch)
Websteed vun Paris Hilton (engelsch)
Websteed vun Paris Hilton (hoochdüütsch)