Partemang
En Partemang oder Schiethuus (ok Tante Meier nöömt) is en lütt Huus mit en Toilett in, dat en beten af von’t Wahnhuus steiht.
Fröher harrn de Hüüs keen fleten Water un de Toilett weer dorüm ok nich mit Water spöölt. De Lüüd hebbt in en Ammel scheten un miegt. Vonwegen den Röök kunn disse Ammel nich binnen’t Huus stahn. Dorüm harrn de Lüüd en lütt Huus extra af von’t Huus. De Ammel müss denn jümmer, wenn he vull weer, op’n Mullhümpel bröcht warrn (un is denn mehrstentieds ingraavt worrn).
In dat 20. Johrhunnert hebbt de Hüüs ok op’n Lannen all fleten Water kregen un de Lüüd hebbt Baadkamern mit waterspöölt Toiletten kregen. Dat Partemang is in Middeleuropa denn bilütten utstorven. Dat gifft aver noch Rebeden, in de dat keen fleten Water un Afwater gifft, in de Schiethüüs noch begäng sünd. Ok Feernhüüs in Skandinavien hebbt faken Partemangs.
