Pauling-Schrievwies

De Pauling-Schrievwies (ok bekannt as Kastenschrievwies) is en eenfache Oort, de Orbitalen in de Chemie graafsch dortostellen. Nöömt is de Schrievwies na den US-amerikaanschen Chemiker vun düütsche Afstammen Linus Carl Pauling.

Waterstoff un Kohlenstoff in de Kastenschrievwies

Normalerwies warrt blots de Nevenquantentall vun de buteren Schaal vun dat Bohrsche Atommodell mit de Spinquantentall dorstellt. De Energieeven vun de Schaal kann afkört in Bookstaven dorbi stahn.

De Orbitalen sülvst warrt in’t Kastenmodell dör lütte quadraatsche Kastens dorstellt. Wenn de Kastens ahn Lück blangenenanner staht, wiest se Orbitalen mit de glieken Nevenquantentall, d. h. mit de glieke Energie. Dat s-Orbital warrt also dör en enkelten Kasten dorstellt, dat p-Orbital dör dree Kastens, dat d-Orbital mit fief Kastens un dat f-Orbital mit söver Kastens blangenenanner.

De Besetten mit Elektronen un jemehr Spinquantentall warrt mit Help vun Pielen anwiest. Steiht in en Kasten een enkelten Piel, is dat Orbital mit een Elektron besett. Wiest en Piel na baven, hett dat Elektron en parallelen Spin. Wenn de Piel dorgegen na ünenn wiest, denn hett dat Elektron ’n antiparallelen Spin. De Hundsche Regel seggt ut, dat toeerst all Orbitalen (Kastens) mit de glieken Nevenquantentall (Energie-Even) eenfach besett warrt. Dorna warrt de Orbitalen mit dat Elektron mit den antiparallelen Spin dubbelt besett.