Pedro Pires
Pedro Verona Rodrigues Pires (* 29. April 1934 in São Filipe op Fogo) weer van März 2001 bit 2011 Staatspräsidenten vun de Republiek Kap Verde.
Leven un politisch Wark
ännernPedro Pires hett an de Universität vun Lissabon in Portugal studeert, woneem he mit de lateren Föhrers vun Befre’ensbewegen tohopen kamen is. De setten sik in för de politische Unafhangigkeit vun de portugeeschen Kolonien. Mit Anfang vun de Kämp in Angola 1961 is he ut Portugal weggahn un hett tohopen mit Amílcar Cabral de PAIGC (Afrikaansch Partei för de Unafhangigkeit vun Guinea un Kap Verde) in’t Leven ropen. Bit to de Nelkenrevolutschoon hett he för de Unafhangigkeit streden un weer dorna de Woortföhrer bi de Verhanneln mit Portugal.
Na de Unafhangigkeitsverkloren vun Kap Verde an’n 5. Juli 1975 is Pires Ministerpräsident worrn un bleev dat bit 1991. To de Tiet is in Kap Verde dat Mehrpartiensystem anstött worrn, wobi Pires ok wedder sien Fingers mit in’t Speel harr. Glieks dorop grünn de Oppositschoon ünner Carlos Beiga de MpD (Bewegen för Demokratie), de bi de Wahl de Mehrheit winnen kunn.
2001 hett sik Pires denn gegen Veiga as Kandidat för’t Präsidentenamt opstellen laten un wünn de Steekwahl mit 17 Stimmen Vörsprung. An’n 22. März 2001 weer he as Nafolger vun António Mascarenhas Monteiro in sien Amt ünner Eid nahmen. Mit knappe Mehrheit is Pedro Pires an’n 12. Februar 2006 wedderwählt worrn, noch mol gegen Veiga. 2011 is he denn vun Jorge Carlos Fonseca aflöst worrn.