Wikipedia

Pete Sampras

Pete Sampras (* 12. August 1971 in Washington, D. C.) is en fröheren US-amerikaanschen Profi-Tennisspeler.

Pete Sampras, 2008

Överblick

ännern

Sampras is de Söhn vun greeksche Inwannerers vun’t Eiland Kos. In sien Tennis-Loopbahn hett he alltohopen 14 Grand-Slam-Turneeren in’t Enkelt wunnen un weer söss Johren lang achterenanner to’t Johresenn op’n eersten Platz vun de Tennis-Weltranglist. Tosamen stünn he 286 Weken lang op’n eersten Platz un weer 1990 mit 19 Johren de bit dorhen jüngste Speler bi de US Open. Blangen Pancho Gonzales, Rod Laver, Björn Borg un Roger Federer gellt Sampras as een vun de besten Profi-Tennisspeler vun all Tieten.

In sien 15 Johren anduern Loopbahn hett he ünner’n Streek 64 Turneeren in’t Enkelt wunnen un twee in’t Dubbel, dorünner ok sövenmol in Wimbledon, fiefmol de US Open un tweemol de Australien Open. Blots bi de French Open harr he keen Spood. Bito weer er fiefmol ATP-Weltmeester, hett ölven Turneeren vun de so nöömten Super-9-Reeg (vundaag: Masters Series) wunnen, weer mit de USA tweemol bi’n Davis Cup spoodriek un weer sössmol to’n Speler vun’t Johr wählt. In sien Bilanz staht 762 wunnene gegen 222 verlorene Spelen.

Tennisloopbahn

ännern

Jöögd un eerste Profijohren (1971-1992)

ännern

Sampras hett sien Vörleev för den Tennissport al in junge Johren opdeckt. Man, eerst as de Familie na Palos Verdes, en Vöroort vun Los Angeles, ümtogen weer, harr h ok de Mööglichkit, den Sport regelmatig to bedrieven. Dat grote Talent vun den dormols negenjohrigen Sampras is vun den Kinnerdokter un freidigen Tennisspeler Pete Fischer opdeckt worrn, de in de Johren dorna ’n Oort Mentor för den Jungen worrn is. Fischer weer dat ok, de verschedene Trainers engageert harr, üm de ünnerscheedlichen Saken in dat Speel vun Sampras to verbetern. De Dokter sülvst, den Sampras later as „snaakschen Wetenschoppler“ beteken de[1] hett sik in sünner’t Maat üm de mentale Siet vun Sampras sien Speel sorgt. So hett he em jümmer wedder vertellt, sik op’n Tennisplatz kontrolleert un mit wenig Geföhl to verhollen un lehr hm ok de histoorsche Bedüden vun de GRand-Slam-Turneeren. Ünner Fischer hett de junge Sampras ok de Spele vun de bekanntsten Tennisprofis ut verleden Tieten studeert. Sünners Rod Laver, den he in’t Öller vun ölven Johren eenmol persönlich drapen hett, harr em düchtig Indruck schinnt mit sien Speel un sien Spood[1][2][3].

Op de Juniorentour hett Sampras bald eersten Spood hatt. Fischer bestünn dorop, dat Sampras in Turneeren spelen de, bi de ok düütlich öllere Spelers mit gröttere Insichten mitspelen deen. Liekers hett sik Sampras gau to een vun de an’n besten inordenten Spelers vun sien Öllersklass entwickelt. He speel to disse Tiet en solide tweehannige Rüchhand, mit de he en seker’t Speel vun de Grundlien maken künn. Fischer hett em dormols mit 14 Johren övertüügt, dat he in tokamen Tieten de Rüchhand eenhannig spelen schüll, un möök ut den soliden Grundlienenspeler en klassischen Serve-and-Volley-Speler[1][2][3]. Kort vör sien Wessel op de Profitour keem Sampras 1987 in dat Veerdelfinale vun de US Open in’t Juniorenenkelt as ok dat Turneerendspeel in’t Dubbel. Dat glieke Johr is he ok för den Junior-Davis-Cup-Wettstriet nomineert worrn.

In siene eersten Saison op de ATP-Tour in de Saison 1988 hett Sampras teihn US-amerikaansche Turneeren speelt, wobi he as gröttsten Spood bi en Turneer in Schenectady bit in’t Halffinale kamen is. An’t Enn vun sien eerst Profijohr stünn he op Platz 97 vun de Tennis-Weltranglist un weer dormit een vun de jüngsten Speler vun de Tennishistorie, de en Saison ünner de besten 100 vun de Weltranglist toennbröcht hebbt. In de folgen Saison hett he ok an de wichtigsten Turneeren in Australien un Europa deelnahmen un künn sik in de Weltranglist üm 16 Räng verbetern. An de Siet vun Jim Courier künn he dat Dubbel vun de Italian Open winnen. En poor Weken later is he vun Fischer uteneengahn, vun den he segg, dat he versöken de „sien Bregen in mien Lief intoplanten“[1].

Joe Brandi weer in de nächste Siason sien ne’en Trainer. Gau künn he sien Resultaten verbetern un wünn in Philadelphia dat eerste mol in sien Loopbahn en Turneer. As he in Manchester een Week vörher en Turneer to’n Vörbereiden wunnen harr, gell he för dat Tennisturneer in Wimbledon as Geheemtipp. Sünners Fred Perry hett em dor en groten Spood vörrutseggt. Man, he is gliek in de eersten Runn gegen den Süüdafrikaner Christo van Rensburg utscheedt. In de Weken dorna güng dat aver wieter opwärts. In de Twüschentiet weer he in de Weltranglist al bit op Platz 15 kladdert. Bi de US Open 1990 hett he op’n Weg in’t Endspeel gegen Ivan Lendl un John McEnroe wunnen un stünn in’t Finale gegen Andre Agassi op’n Platz. Ok den hett he in dree Sätz beet kregen. Somit weer Sampras mit 19 Johren un 28 Daag de jüngste Winner vun de US Open siet all Tieten. Later segg he dorto, dat he för dissen groten Spood noch gor nich sowiet weer, nich as Tennisspeler un ok nich as Person[4]. Wohrhaftig hett dat meist dree Johren duert, bit Sampras sien nächsten Grand-Slam-Spood fiern künn. An’t Enn vun de Saison stünn he op Platz 5 vun de Weltranglist.

 
Pete Sampras in’n August 1992

Ok de Saison 1991 verlööp spoodriek för Sampras, wenn ok ahn groten Sieg bi de Gran-Slam-Turneeren. He stünn acht mol in’t Endspeel op de ATP-Tour un hett de Hälft dorvun wunnen. Na de US Open hett he sik vun sien Trainer Joe Brandi splitt un Tim Gullikson as ne’en Trainer engageert, de ok mit al Tennisstars as Martina Navrátilová, Mary Joe Fernandez un Aaron Krickstein arbeit harr. Enn vun’t Johr stünn Sampras ok to’n eersten mol in’n US-amerikaanschen Kader för den Davis-Cup för dat Endspeel gegen de Mannschop ut Frankriek. He hett sien beiden Enkelt-Spelen aver beid verloren. Opletzt hett he de Saison mit Platz 6 op de Weltranglist afslaten.

In sien bitherige Loopbahn harr sik Sampras jümmer teemlich op sien starken Opslag verlaten. Gullikson geev sik nu Möh, ut em en vullstännigeren Speler to maken un harr dormit ok eersten Spood. So hett he in de Saison 1992 tovn eersten mol ok op Sandplätz go’e Resultaten hatt, de he vördem lever ut’n Weg gahn is. To’n Bispeel töög he bi de French Open in’t Veerdelfinale in. In Wimbledon keem he bit in’t Halffinale un bi de US Open sogor bit in’t Endspeel, dat he aver gegen Stefan Edberg verloren hett. Sampras segg later, dat he en poor Nachten nich slapen künnt harr wegen sien Nedderlaag un he dör dat Speel markt harr, wo wichtig em de Spood jüst bi de Grand-Slam-Turneeren weer[3]. De Saison hett he op Platz 3 vun de Weltranglist beennt.

An de Weltspitz (1993-1998)

ännern

Dat folgen Johr hett Sampras mit Gullikson wieter an sien Technik arbeit un is bi Turneren in de eersten Maanden blots eenmol vör’t Halffinale rutflagen. Na sien drüdden Sieg vun de Saison in Tokio is he to’n eersten mol op den eersten Platz vun de Weltranglist kamen, wat en Diskusschoon utlöst hett, wat een Speler wohrhaftig den eersten Platz tostahn kann, wenn he blots een eenzig Grand-Slam-Turner wunnen hett. Den tweeten Grand-Slam-Titel wunn he aver kort later in Wimbledon. Sien Spitzenrang in de Weltranglist künn he op jeden Fall hollen un fastmaken. In de Saison 1994 güng dat so wieter, dat Sampras en herrschen rull in’t Tennis vun de Mannslüüd innahmen hett. Wohrhaftig hett he bit to de French Open jüst mol dree Spelen verloren un weer na Rod Laver in’t Johr 1969 de eerste, de wedder dree Grand-Slam-Titel in de Reeg winnen künn. Blots de French Open kunn he wedder nich winnen. As he sik na Wimbledon an’n Knövel besehrt harr, künn he bit to de US Open keen wietere Spelen maken, so dat he bi dat Turneer noch nich wedder sien vulle Fitness harr. To’t Enn vun de Saison hett he sien olle Form aver wedderfunnen un hett to’n tweeten mol de ATP-Weltmeesterschop wunnen. Sien Spitzenplatz in de Weltranglist hett he de hele Saison över wohren künnt.

In’t Johr 1995 is bi sien Trainer Gullikson en Bregentumor faststellt worrn, nadem he een poor Daag vörher en Swäckanfall harr[1]. Sampras hett de Vörfall emotschonal teemlich angrepen. Wenige Maanden later müss he den eersten Platz in de Ranglist an sien Landsmann Agassi afgeven. Bit Wimbledon hett he denn blots noch twee Turneren winnen künnt un is sünners op Sandplätz tomeist fröh utscheedt. In Wimbledon hett he aver wedder wunnen. Twüschen Agassi un em keem dat na fakener to spannende Spelen, vun wegen dat bei noch Mööglichkeiten harrn, to’t Johresenn den eersten Platz in de Weltranglist to bekleden. Wohrhaftig keem dat bi de US Open denn to dat Duell twüschen de beiden, bi dat Sampras de Nees an’t Enn vörn harr. Agassi hett eerst Johren later wedder to sien Form vun dat torüchfunnen, man Sampras kreeg wenige Weken later sien Spitzenpositschoon wedder torüch un hett ehr ok bi’t to’n Saisonsluss hollen.

De Saison 1996 füng dörwossen an. Sien Hööchpunkt wies Sampras bi de French Open, de aver in’n Schadden stünnen vun den Dood vun sien fröheren Trainer Tim Gullikson. Liekers speel he hier mit de beste Leistung vun sien Loopbahn, is aver eenmol mehr in’t Halffinale utscheedt. Paul Annacone is nu sien ne’en Trainer worrn. Nadem he in Wimbledon nich övertügen künn, keen he in de amerikaanschen Hardplatzsaison wedder richtig in Fohrt. Sien achten un letzten Saisontitel hett he dat Johr bi de ATP-Weltmeetserschop wunnen. Dor hett he Boris Becker in en Match slahn, dat veer Stünnen anduert hett. Ünner Tennisexperten gellt dat Speel bit hüüt as een vun de besten Tennisspelen, dat dat je geven hett. In de folgen Saison 1997 künn Sampras to’n tweeten mol in sien Loopbahn dat hele Johr över sien eersten Platz in de Ranglist hollen.

As nu junge Spelers as Marcelo Rios oder Patrick Rafter jümmer dichter an den Punktestand vun Sampras rankemen, lööp Sampras 1998 Gefohr, dat he duersom sien Spitzenplatz in de Welt afegeven müss. In’n März is he torüchfallen, künn sik aver na een Maand de Spitz wedder torüchholen. Wimbledon hett he dat Johr to’n föfften mol in sien Loopbahn wunnen. Mit ölven Grand-Slam-Titels töög he in de Statistik gliek mit Rod Laver un Björn Borg. In’t Halffinale vun de US Open geev dat en medienwirksom Speel gegen Rafter, dat Sampras verloren hett. Kritikers düden dat as en Teken, dat Sampras sien grote Tiet nu vörbi weer. Sampras aver wull tp’n sössten mol en Saison op’n eersten Platz afsluten, wat in de Hitorie vun’n Tennis noch keen Speler vör em henkregen harr[4]. Dorop hett he för den Rest vun de Saison henarbeit un künn sik ok dörsetten. Dat is en Rekord, den Sampras ok vundaag noch höger beweerten deit as vele annere Leistungen vun sien Loopbahn.

De letzten Johren (1999-2003)

ännern

De Kamp üm de Spitz hett Sampras veel Knööv köst, so dat he 1999 eerst mol een Maand Poos maakt hett. Ok haar he Problemen mit sien Rüch un künn in San José nich to’t Halffinale antreden vun wegen dat sien Foot besehrt weer. Dorüm müss he wedder een Maand töven. In de Weltranglist hett he jümmer mehr Punkten verloren, wat em na sien Rekord ut de Vörsaison nu aver nich mehr stören de. Gröttere Bedüden harr för em nu de Grand-Slam-Rekord vun Roy Emerson, den he noch slahn künn. In Wimbledon weer dat denn soweit, dat he mit Emerson gliektehn künn. Wenige Weken later kämp sik Samnpras noch mol wedder op Platz 1 vun de Weltranglist vör. Kort vör de US Open hett he sik in’t Training aver noch mol wedder en Sehr totogen un müss wedder twee Maanden Poos inleggen. Sien Spitzenplatz künn he dormit nich mehr hollen, ofschoonst he gau wedder to grote Form oplopen is.

Ok 2000 harr he wedder Problemen mit de Gesundheit un müss gliek to Anfang vun’t Johr en wietere Dwangspoos inleggen. He hett nu sien Kräft för de groten Turneren opspart un nöhm meist blots noch an Turneren vun’n Grand Slam un vun de Masters-Series deel. He hett in dat Johr dat Turneer vun Wimbledon eenmol mehr winnen künnt un dormit en ne’en Rekord opstellt.

Rekord-Grand-Slam-Winners (Mannslüüd)
Rang Tennisspeler Tall
1.   Roger Federer 16
2.   Pete Sampras 14
3.   Roy Emerson 12
4.   Björn Borg 11
  Rod Laver
6.   Bill Tilden 10
Stand: 31. Januar 2010

In de Saison 2001 hett Sampras to’n eersten mol siet 1989 keen eenzig Turneer winnen künnen. Ok in de Weltranglist künn he sien Niveau vun de vöhrigen Johren nich mehr hollen. Ok in Wimbledon, woneem he dat Turneer lange Tiet domineert harr, is he gegen Roger Federer utscheedt un tell in de Weltranglist nu to’n eersten mol siet 1990 nich mehr to de besten teihn. Wiel de amerikaanschen Hardplatzsaison güng dat wedder en beten bargop, so dat he doch noch tweemol in’t Endspeel stünn. De beste Leistung wies he bi de US Open, woneem he Spelers as Agassi, Rafter un den Vörjohrswinner Marat Safin beet kreeg. Man in’t Endspeel lang dat opletzt wedder nich för’n Sieg. En letzten Optritt harr he in Stuttgart un slööt de Saison denn vör de Tiet af. Enn vun’t Johr weer doröver snackt, dat he sik vun sien Trainer Paul Annacone splitten wull.

To de ne’en Saison stell stell Sampras denn Tom Gullikson as ne’en Trainer vör, den Tweeschenbroder vun sien fröheren Trainer Tim Gullikson. Spood harr Sampras aver nich wedder. Nadem Sampras vörher al na lange Johren sien Verdrag mit Nike nich verlängert harr un ok mit sien Manager uteneen gahn weer, weer ok de Tosamenarbeit mit Tom Gullikson na dree Maandan wedder vörbi. As ne’en Trainer hett he José Higueras instellt, de em sünners för de French Open fit maken schüll. De Spood bleev wieter ut, so ok bi de Grand_Slam-Turneren, worophen Sampras ok Higueras op de Straat seten de un wedder torüch na Paul Annacone güng. Mit en dörwossen Bilanz is he na de US Open föhrt, wo he wedder bit in’t Endspeel keem. In’t Endspeel drööp he dor op Andre Agassi, gegen den he sien eersten Turneersieg siet mehr as twee Johren un dormit ok den 14. Grand-Slam-Titel winnen künn. Wietere Turneren hett Sampras in dat Johr nich mehr speelt. 2003 weer jümmer wedder mol ankünnigt, dat Sampras bi sünnere Turneren wedder an’n Start gahn wull, man den hett he doch jümmer wedder torüchtogen. Kort vör de US Open 2003 is denn bekannt geven worrn, dat he sien Loopbahn bi en Zeremonie op’n Center Court vun Flushing Meadows an’n 25. August 2003 afsluten wull.

Comeback 2006

ännern
 
Pete Sampras, Champions Cup Boston, 2007

Nadem Sampras na egen Verkünnen in de wieteren Johren kuum wirklich traineert harr, is in’n Februar 2006 bekannt geven worrn, dat he op de World Team Tennis (WTT) Series sien Comeback geven wull. Dorbi schüll he söss oder söven Spele in de regulären Saison bestrieden. An’n 6. April 2006 geev he en tosätzlich Speel in’n Rahmen vun’t Inladungsturneer River Oaks International in Houston gegen Robby Ginepri. En Comeback op de ATP-Tour hett Sampras aver nich plaant, as he sülvst segg[5]. Ok de Johren dorna hett he wedder Turneren speelt un ok en poor wunnen. An’n 14. Juli 2007 is he in de Tennis Hall of Fame opnahmen worrn.

Privatleven

ännern

Sampras hett en Broder un twee Süsters. De öllere Süster Stella Sampras hett sülvst ok Tennis speelt un arbeit vundaag as Tennistrainersche an de University of California. An’n 30. September 2000 hett he de US-amerikaansche Schauspelersche Bridgette Wilson heiraat, de he een Johr vörher kennenlehrt harr. Se hebbt tohopen twee Kinner. Vörher weer Sampras twee Johren lang mit de Schauspelersche Kimberly Williams tohopen un harr en korte Verbinnen mit de Schauspelersche Lauren Holly[1].

Pete Sampras lidd ünner de Arvkrankheit Thalassämie, de in de Regel keen Anämie utlösen deit, aver en sietere Tall vun Erythrozyten to Folg hebben kann. Dat löst Problemen mit’n Kreisloop ut un Mööd utlösen. He sülvst meen, dat de Krankheit em vör allen bi hitte Bedingen tosett harr. He harr de Krankheit aver nicht publiek maakt, üm nich siene Gegners de Sekerheit to geven, dat he mit en Nadeel speelt[4].

Rekorden

ännern
  • Sampras hett bit to’n 5. Juli 2009 de Rekordtall vun 14 wunnene Grand-Slam-Titels in siene Loopbahn hollen. Nadem Roger Federer bi dissen Rekord an’n 7. Juni 2009[6] gliektogen is, hett he em an’n 5. Juli 2009 mit den 15. Grand-Slam-Sieg överdrapen[7].
  • Sössmol in de Reeg (1993–1998) künn Sampras de Saison op Platz 1 vun de Weltranglist toennbringen.
  • Tosamen stünn he 286 Weken op Platz 1 vun de Weltranglist.
  • Sampras hett mehr as 43 Millionen US-Dollar an Priesgeller wunnen, un stünn dormit bit Oktober 2008 op Platz 1 vun de Priesgeldrekordlist. Roger Federer hett em denn överholt.
  • Sampras stünn 11 Johren achterenanner (1992–2002) in tomindest en Grand-Slam-Endspeel in de Saison.
  • Blangen Ken Rosewall is Sampras de eenzige Speler, de en Grand-Slam-Turneer as Teenager, in siene 20er un in siene 30er winnen künn.
  • Blangen Ivan Lendl un Roger Federer künn Sampras as eenzigen Speler fiefmol dat Johresendturneer winnen.
  • Mit 19 Johren un 28 Daag weer he 1990 de jüngste US-Open-Winner vun all Tieten.
  • Mit söven Titels in Wimbledon hett he den Rekord vun William Renshaw instellt.

Utteken

ännern
  • 6-mol ATP-Speler vun’t Johr (1993–1998).
  • 6-mol ITF World Champion (1993–1998).
  • 9 Espy Awards

Bilanz

ännern
Turnier 1988 1989 1990 1991 1992 1993 1994 1995 1996 1997 1998 1999 2000 2001 2002 Loopbahn
Australian Open - 1R AF - - HF S F 3R S VF - HF AF AF 2
French Open - 2R - 2R VF VF VF 1R HF 3R 2R 2R 1R 2R 1R 0
Wimbledon - 1R 1R 2R HF S S S VF S S S S AF 2R 7
US Open 1R AF S VF F S AF S S AF HF - F F S 5
Masters Cup - - RR S HF F S HF S S HF S HF - - 5
Grand-Slam-Bilanz 0:1 4:4 10:2 6:3 15:3 23:2 21:2 20:2 18:3 19:2 17:3 8:1 18:3 13:4 11:3 203:38
Turneersiegen 0 0 4 4 5 8 10 5 8 8 4 5 2 0 1 64
Weltranglist 97 81 5 6 3 1 1 1 1 1 1 3 3 10 13

Wunnen Turneren

ännern
Legende
Grand Slam (14)
Tennis Masters Cup (5)
ATP Masters Series (11)
ATP Tour (34)
Nr. Datum Turneer Belag Finalgegner Ennresultat
1. 19. Februar 1990 Philadelphia, USA Teppich   Andres Gomez 7:6, 7:5, 6:2
2. 18. Juni 1990 Manchester, England Gras   Gilad Bloom 7:6, 7:6
3. 27. August 1990 US Open, USA Hardplatz   Andre Agassi 6:4, 6:3, 6:2
4. 11. Dezember 1990 Grand Slam Cup, Düütschland Teppich   Brad Gilbert 6:3, 6:4, 6:2
5. 29. Juli 1991 Los Angeles, USA Hardplatz   Brad Gilbert 6:2, 6:7, 6:3
6. 12. August 1991 Indianapolis, USA Hardplatz   Boris Becker 7:6, 3:6, 6:3
7. 14. Oktober 1991 Lyon, Frankriek Teppich   Olivier Delaître 6:1, 6:1
8. 12. November 1991 ATP-Weltmeesterschop, Düütschland Teppich   Jim Courier 3:6, 7:6, 6:3, 6:4
9. 17. Februar 1992 Philadelphia, USA Teppich   Amos Mansdorf 6:1, 7:6, 2:6, 7:6
10. 20. Juli 1992 Kitzbühel, Öösterriek Sand   Alberto Mancini 6:3, 7:5, 6:3
11. 10. August 1992 Cincinnati, USA Hardplatz   Ivan Lendl 6:3, 3:6, 6:3
12. 17. August 1992 Indianapolis, USA Hardplatz   Jim Courier 6:4, 6:4
13. 19. Oktober 1992 Lyon, Frankriek Teppich   Cedric Pioline 6:4, 6:2
14. 11. Januar 1993 Sydney, Australien Hardplatz   Thomas Muster 7:6, 6:1
15. 12. März 1993 Miami, USA Hardplatz   MaliVai Washington 6:3, 6:2
16. 5. April 1993 Tokio, Japan Hardplatz   Brad Gilbert 6:2, 6:2, 6:2
17. 12. April, 1993 Hong Kong, Hong Kong Hardplatz   Jim Courier 6:3, 6:7, 7:6
18. 21. Juni 1993 Wimbledon, England Gras   Jim Courier 7:6, 7:6, 3:6, 6:3
19. 30. August 1993 US Open, USA Hardplatz   Cedric Pioline 6:4, 6:4, 6:3
20. 18. Oktober 1993 Lyon, Frankriek Teppich   Cedric Pioline 7:6, 1:6, 7:5
21. 8. November 1993 Antwerpen, Belgien Teppich   Magnus Gustafsson 6:1, 6:4
22. 10. Januar 1994 Sydney, Australien Hardplatz   Ivan Lendl 7:6, 6:4
23. 17. Januar 1994 Australian Open, Australien Hardplatz   Todd Martin 7:6, 6:4, 6:4
24. 28. Februar 1994 Indian Wells, USA Hardplatz   Petr Korda 4:6, 6:3, 3:6, 6:3, 6:2
25. 11. März 1994 Miami, USA Hardplatz   Andre Agassi 5:7, 6:3, 6:3
26. 28. März 1994 Osaka, Japan Hardplatz   Lionel Roux 6:2, 6:2
27. 4. April 1994 Tokio, Japan Hardplatz   Michael Chang 6:4, 6:2
28. 9. Mai 1994 Rom, Italien Sand   Boris Becker 6:1, 6:2, 6:2
29. 20. Juni 1994 Wimbledon, England Gras   Goran Ivanisevic 7:6, 7:6, 6:0
30. 7. November 1994 Antwerpen, Belgien Teppich   Magnus Larsson 7:5, 6:4
31. 15. November 1994 ATP-Weltmeesterschop, Düütschland Teppich   Boris Becker 4:6, 6:3, 7:5, 6:4
32. 6. März 1995 Indian Wells, USA Hardplatz   Andre Agassi 7:5, 6:3, 7:5
33. 12. Juni 1995 Queen’s Club, England Gras   Guy Forget 7:6, 7:6
34. 26. Juni 1995 Wimbledon, England Gras   Boris Becker 6:7, 6:2, 6:4, 6:2
35. 28. August, 1995 US Open, USA Hardplatz   Andre Agassi 6:4, 6:3, 4:6, 7:5
36. 30. Oktober 1995 Paris, Frankriek Teppich   Boris Becker 7:6, 6:4, 6:4
37. 12. Februar 1996 San José, USA Hartplatz   Andre Agassi 6:2, 6:3
38. 19. Februar 1996 Memphis, USA Hardplatz   Todd Martin 6:4, 7:6
39. 8. April 1996 Hong Kong, Hong Kong Hardplatz   Michael Chang 6:3, 3:6, 6:4
40. 15. April 1996 Tokio, Japan Hardplatz   Richey Reneberg 6:4, 7:5
41. 12. August 1996 Indianapolis, USA Hardplatz   Goran Ivanisevic 7:6, 7:5
42. 26. August 1996 US Open, USA Hardplatz   Michael Chang 6:1, 6:4, 7:6
43. 23. September 1996 Basel, Swiez Hardplatz   Hendrik Dreekmann 7:5, 6:2, 6:0
44. 19. November 1996 ATP-Weltmeisterschaft, Düütschland Teppich   Boris Becker 3:6, 7:6, 7:6, 6:7, 6:4
45. 13. Januar 1997 Australian Open Hardplatz   Carlos Moya 6:2, 6:3, 6:3
46. 10. Februar 1997 San José, USA Hardplatz   Greg Rusedski 3:6, 5:0 ogv.
47. 24. Februar 1997 Philadelphia, USA Hardplatz   Patrick Rafter 5:7, 7:6, 6:3
48. 23. Juni 1997 Wimbledon, England Gras   Cedric Pioline 6:4, 6:2, 6:4
49. 4. August 1997 Cincinnati, USA Hardplatz   Thomas Muster 6:3, 6:4
50. 23. September 1997 Grand Slam Cup, Düütschland Teppich   Patrick Rafter 6:2, 6:4, 7:5
51. 27. Oktober 1997 Paris, Frankriek Teppich   Jonas Björkman 6:3, 4:6, 6:3, 6:1
52. 10. November 1997 ATP-Weltmeisterschaft, Düütschland Hardplatz   Jewgeni Kafelnikow 6:3, 6:2, 6:2
53. 23. Februar 1998 Philadelphia, USA Hardplatz   Thomas Enqvist 7:5, 7:6
54. 27. April 1998 Atlanta, USA Sand   Jason Stoltenberg 6:7, 6:3, 7:6
55. 22. Juni 1998 Wimbledon, England Gras   Goran Ivanisevic 6:7, 7:6, 6:4, 3:6, 6:2
56. 12. Oktober 1998 Wien, Öösterriek Teppich   Karol Kucera 6:3, 7:6, 6:1
57. 7. Juni 1999 Queen’s Club, England Gras   Tim Henman 6:7, 6:4, 7:6
58. 21. Juni 1999 Wimbledon, England Gras   Andre Agassi 6:3, 6:4, 7:5
59. 26. Juli 1999 Los Angeles, USA Hardplatz   Andre Agassi 7:6, 7:6
60. 9. August 1999 Cincinnati, USA Hardplatz   Patrick Rafter 7:6, 6:3
61. 22. November 1999 ATP-Weltmeesterschop, Düütschland Hardplatz   Andre Agassi 6:1, 7:5, 6:4
62. 20. März 2000 Miami, USA Hardplatz   Gustavo Kuerten 6:1, 6:7, 7:6, 7:6
63. 26. Juni 2000 Wimbledon, England Gras   Patrick Rafter 6:7, 7:6, 6:4, 6:2
64. 26. August 2002 US Open, USA Hardplatz   Andre Agassi 6:3, 6:4, 5:7, 6:4

Literatur

ännern
  • H. A. Branham, Bud Collins:Sampras: A Legend in the Works, Verlag: Bonus Books; 1st ed edition, o. O. Oktober 1996, ISBN 1-56625-062-5 (engelsch)
  • Michael Boughn, Joseph Romain:Pete Sampras (Champion Sport Biographies), Verlag: Warwick House Pub., o. O. Oktober 1999, ISBN 1-894020-56-1 (engelsch)

Borns

ännern
  1. ↑ a b c d e f The New York Times „A 90's Kind of Rivalry“ vun Peter de Jonge http://web.archive.org/web/20080111021510/http://www.geocities.com/hovav13/art-A_90s_Kind_of_Rivalry.html
  2. ↑ a b ESPN.com „Who's Pete Sampras?“ von Larry Schwartz http://216.194.87.192/personal.htm
  3. ↑ a b c World Traveler „In Pursuit of Perfection“ vun Joel Drucker
  4. ↑ a b c http://www.ne.jp/asahi/pete/sampras/archives/interview/IUST0009E.html
  5. ↑ http://sportsillustrated.cnn.com/2006/writers/justin_gimelstob/03/07/sampras.practice/index.html
  6. ↑ „14. Grand-Slam-Titel für Roger Federer„“, Swiezer Feernsehn, 9. Juni 2009
  7. ↑ „Federer nach Hitchcock-Finale definitiv der Beste“, 20 Minuuten Online 5. Juli 2009

Weblenken

ännern
  Pete Sampras. Mehr Biller, Videos oder Audiodateien to’t Thema gifft dat bi Wikimedia Commons.
Vun „https://nds.wikipedia.org/w/index.php?title=Pete_Sampras&oldid=918593“