Peter Mansfield
Sir Peter Mansfield (* 9. Oktober 1933 in London; † 8. Februar 2017) weer en britisch Physiker, emeriteert Perfesser för Physik an de University of Nottingham, de 2003 den Nobelpries för Physiologie oder Medizin tospraaken wurr. Den kreeg he gemeensam mit Paul Christian Lauterbur för hör Opdecken in' Tosommenhang mit de Magnetresonanztomographie.
Biographie ännern
Fröh Johren un Utbillen ännern
Peter Mansfield wurr 1933 in den Stadtdeel Lambeth in London as Söhn vun den Gasinstallateur Sidney George Mansfield un sien Fru Rose Lillian boren. He weer de jüngste vun dree Bröers, sien öllere Geschwister weern Conrad William un Sidney Albert, un is in Camberwell upwussen. As he söss Johr olt weer brook de Tweete Weltkrieg ut un he wurr as Kind wiels de Kriegsjohren dreemal ur London evakueert. So verbroch he eerst en paar Week in Seven Oaks un later tweemal in Torquay. Nah den Krieg hett he sien Schoolutbillen1948 an de Secondary School in Peckham afslooten. Dornah hett he dree Johr bi en Maler arbeit. Dornah hett he sien Interesse an RakeetRaketen opdeckt un kreeg en Job bi dat Ministry of Supply an dat Rocket Propulsion Department in Westcott, Buckinghamshire. Nah 18 Maand wurr he to de Armee inberopen un bleev dor för twee Johr un kehr dornah nah Westcott zurück.
1956 fung Peter Mansfield sien Physikstudium an dat Queen Mary College vun de University of London an. Hier bestunn 1959 en Projekt dorin, en draagbar Karnspinresonanz-Spektrometer (NMR) up de Basis vun Transistortechnologien to entwickeln. He hett disse Upgaav lööst un kreeg later en Anstellung bi sien Perfesser Jack Powles in den Beriek vun de Karnspinresonanzforschung. Dat Hööftinteresse vun de Arbeitsgrupp leeg in de Erforschung vun Molekularbewegungen in verscheeden Materialien, besünners in Fleetigkeiten. Sien Upgaav wurr de Konstruktschoon vun en Spektrometer, um fast Polymere to ünnersöken. In' Tpspmmenhang mit disse Arbeit hett he de solid echoes (Fastkörperresonanzen) opdeckt un hett doröver en Publikatschoon över disse Resonanzphänomen in en eenzelt Gipskristall herutbrocht un hett ok to dit Thema sien Dokterarbeit schreeven.
Forschungsarbeiten in den USA ännern
Nah sien Promotschoon in Physik, de he 1962 afslooten hett, gung he up Inlaaden vun Charlie Slichter hen för twee Johr an de University of Illinois in Urbana. Vör sien Afreis hett he noch Jean Margaret Kibble heiraadt, de hüm denn ok nah Illinois begleit hett un mit de he twee Döchter hett. Sien Forschung in Illinois bestunn ut de NMR-Spektroskopie an doteert Metallen, vör allen an Legeeren vun Kopper un Zink. Hier wull he dat Resonanzverhollen vun de Kopperelektronen an Zinkatomen meeten un hett dorför en speziell Spektrometer entwickelt.
Sien Postdoktorandentiet in Illinois düer twee Johr an un kunn de Vörherseggen vun sien Kollegen nich bestätigen, dat sück de Elektronen an' Zink anners verhollen un en spezifische Resonanz ergeeven denn. Sien Arbeit an den Fastkörperresonanzen kunn he aber in dat Labor vun Charlie Slichter nich wiederführen. Allerdings hett en ehmalg Kolleeg ut London, Doug Cutler, ebenfalls in Urbana an dit Thema arbeit un hett dorbi en ähnlichen Upbau bruukt, as hüm Mansfield för sien Forschungen konstrueert harr. Mansfield hett hüm överreed, dat he sien Labor för eenige Experimente bruuken kunn. He hett hier de Resonanz an dat Natriumfluorid (NaF) utforscht un dorto en wietestgahnd theoretische Publikatschoon dorto herutbrocht.
Nottingham ännern
Nah de Postdoktorandentiet kehr Peter Mansfield 1964 nah London torüch. Mansfield kreeg en Stäe as Dozent un Forschungsassistent an de University of Nottingham bi Perfesser Raymond Andrew. Hier kreeg he sien eegen Labor, um sien Multiple-Pulse-NMR, en Spektrometer to dat Erfaaten vun de Karnspinresonanz mit mehreren koordineerten Pulsen, to konstrueeren un to testen. In dat eerst Johr kreeg mit Don Ware en Forschungsstudenten, de sien Master of Science in den Beriek vun de NMR in Kanada maakt harr un mit de he sien eerste Versöök vun de Multiple-Pulse-NMR dörführen kunn. 1965 keem Mansfield sien eerst Lehrer Jack Powles an de Universität nah Nottingham för en Kolloquium un Mansfield führ hüm sien konstrueert Gerät vör. De kunn vun en ähnlichen Upbau in dat labor vun John Waugh an dat Massachusetts Institute of Technology (MIT) berichten un kört dornah keemen in kört Folg Publikatschonen vun beid Arbeitsgruppen, de in en Forschungsstriet vun beid Institutschonen ehr Hööchtpunkt funnen, de bit in de fröh 1970er Johren recken dee.
1972 is mit Alan Garroway en amerikaansch Postdoktorand vun de Cornell University to de Arbeitsgrupp stött, de sück in sien Doktorarbeit mit NMR-Studien in bewegt Fleetigkeiten befaat harr. Mansfield harr to de Tiet vun sien NMR mit en fröhen Computer mit en Arbeitsspieker vun veer Kilobyte utstatt un een vun de eerst Upgaven vun Garroway weer de Entwicklung vun en Methood um de Ergevnisse vun den NMR middels Computers to en Spektrum genereeren to laaten. Enn' 1972 weer Mansfield dordör in de Laag, en computerkontrolleert Spektrometer to bruuken, um verscheeden Materialien to ünnersöken. Dat maak dat mögelk bannig flink Analysen hentokriegen, womit eerstmals ok Spektrogramme an sück gau chemisch verännern Materialien dörführt wurrn kunnen. Dat Hööftoogenmark leeg dorbi up dat Calciumfluorid.
1972 is Mansfield an dat Max Planck Institut für medizinische Forschung in Heidelbarg reist, um mit Karl Hermann Hausser tosommentoarbeiten. Mit sien Arbeitsgrupp stunn he in disse Tiet in Breefkuntakt, sien Doktorand Peter Grannell führ de Versöök an den NMR wieder, indem he versöken dee, en Kristallgitter vun dat Calciumfluorit mit Hülp vun Snitten vun den Kampfer to kriegen un de Spektren so lang uptonehmen bit en klar eenzelt Spektrallien erkennbar wurr. Dat wurr Enn' 1973 reckt un bekannt maakt. Up en Konferenz in Krakau wurr dat Ergevnis vörstellt un diskuteert. In' Rahmen vun disse Diskussion hett Mansfield eerstmals vun den Arbeiten vun Paul Lauterbur erfohren, de in en ähnlich Feld tätig weer un de sück dorbi up Studien in Fleetigkeiten konzentreeren dee. Nahdem he de sien Warken studeert harr, stell sück herut, dat dat tatsächlich Parallelen geev. Bi beid Ansätzen stell sück de Fraag, wat as verännerliche Proov betekent wurrn kunn. Lauterbur harr dorbi eerste Versöök ünnernommen, de Proven bildlich dortostellen. De Studien hemm en Grundlaag dorstellt, up de dat mögelk ween kunn, biologisch Systeme mit Hülp vun de Multiple-Pulse-NMR to bekieken.
Up en Konferenz in Indien 1974 stell Lauterbur sien Ergevnisse vör un ok vun dat Institut in Nottingham weern eenige Forscher anwesend, de sück later Gedanken um en Ümsetten vun den s Bildgeven Prozess bi dat Ankieken vun de Resonanzantworten vun magnetischen Impulsen maaken deen un dat Mansfield mitdeelen deen, de an de Konferenz nich deelnommen harr.
Utteknungen ännern
Mansfield wurr för sien Arbeit tallriek Utteknungen verleeht. Ünner annern wurr he 1987 Liddmaat vun de Royal Society, de hüm 1984 den Wellcome Prize tospraaken harr. 1993 wurr he to'n Ridder slahn. Tosommen mit Paul Christian Lauterbur kreeg he 2003 den Nobelpries för Physiologie oder Medizin.
Weblenken ännern
- http://www.nobelprize.org/nobel_prizes/medicine/laureates/2003/ Sir Peter Mansfield up de Sieden vun den Nobelpries (engelsch)]
- University of Nottingham