Plimsollmark
De Plimsollmark oder Freebordmark is en Mark up en Seeschipp. Se gifft an, wat for'n maximalen Deepgang en Schipp hebben draff un dor also mit, wie vull en Schipp beladen weern draff. Ofschoonst dat nich direktemang en Infloot up de Stabilität vun en Schipp hett, gifft en grötter Freeboord amenne doch mehr Sekerheit. De Mark hett ehrn Naam vun den Briten Samuel Plimsoll, de sik duchtig insett hett för de Inföhren vun en Freeboordmark. Dor woll he de Antahl vun Unglücke up See mit överladene Scheepe mit ingrenzen. In de Binnenschipperee gifft dat en Watermark, de mit de Plimsollmark to verglieken is.
Bi Hannelsscheepe liggt de Mark up halve Längde vun dat Schipp, nich wiet af vun den Hööft-Rahmenspant, up beide Sieten vun den Schippsrump, just unner den Deckstreek, wo dat Freeboorddeck mit antekent is.
De Freeboordmark besteiht ut en Ring vun 300 mm (12 Toll Buten-Döörmeter. De Streeke sund akraat 25 mm (1 Toll) dick. Düsse Ring warrt in'e Waag dörsneden mit en Streek, de 450 mm (18 Toll) lang un 25 mm breet is. De Böverkant vun den Streek geiht dör de Midden vun den Ring dör.
De Afstand vun de Freeboordmark vun den Deckstreek (Böverkant Streek bit Böverkant Streek) is de Summerfreeboord.
Plimsollmark un Lademark
ännern
De Lademarken geevt den ringsten Freeboord an, de tolaten is, un betreckt sik dor up, datt Sööt- un Seewater en unnerscheedlich Spezifisch Gewicht hefft un datt dat in'n Summer un in'n Winter, un denn ok noch in de Tropen sik noch mol verschelen deit. Dat hannelt sik dor um waagrechte Streeke bi. Se sund 230 mm lang (9 Toll) un 25 mm breet (1 Toll). Se gaht in'n rechten Winkel af vun en 25 mm breden, lootrechten, Streek. Düsse Streek is 540 mm (21 Toll) vör den Middelpunkt vun den Ring vun de Plimsollmark anbrocht wurrn. Wenn dat nich utdrücklich anners utmaakt wurrn is, denn so gaht de Streeke vun de Lademarken na vörn vun den lootrechten Streek af.
- TF = Freeboord Frischwater (Söötwater) Tropisch,
- F = Freeboord in Frischwater,
- T = Freeboord in tropisch Seewater,
- S = Sommerlademark (Freeboordmark nah Freeboordtüügnis),
- W = Freeboord in Seewater in'n Winter,
- WNA = Freeboord in Seewater in'n Winter in'n Noordatlantik.