Portal:Wikinews/Plattdüütsch Book vun’t Johr is „Platt!“

30. Oktober 2008: Dat Plattdüütsche Book vun’t Johr is 2008 de Band Platt! vun Stefan Bargstedt. Dat hett de Priesjury vun Carl-Toepfer-Stiftung un dat Institut för Nedderdüütsche Spraak nu bekannt geven. Bargstedt schall den Pries, de mit en Priesgeld vun 2000 Euro verbunnen is, op de Plattdüütsche Bookmess in Hamborg (8. un 9. November) in’e Hannen kriegen.

Dat Book hett den Pries kregen ofschoonst en groten Deel vun dat Book op Hoochdüütsch schreven is. Dat Book vertellt över de plattdüütsche Spraak un Literatur, behannelt allens vun de Hanse bet to en plattdüütsch Labskaus-Rezept, un dat allens mit en fein un modern Design. Dat Book schall Anreiz geven, dat Lüüd sik mit Plattdüütsch utenannersetten doot. Dat 220 Sieden starke Book baseert op de Diplomarbeit vun Bargstedt, de he för sien Studium vun dat Integreerte Design Swoorpunkt Minsch un Information an de Hoochschool för de Künsten in Bremen schreven hett.