Portal:Wikinews/Scholen in Sleswig-Holsteen kriegt Plattdüütsch-Segel

Middweken, 11. Juli 2007: De Präsident vun’n Landdag in Sleswig-Holsteen, Martin Kayenburg un Bildungsministerin Ute Erdsiek-Rave hebbt an’n 11. Juli 2007 in Kiel fief Scholen in dat Bundsland mit dat Plattdüütsch-Schoolsegel uttekent. Dat Segel kriegt se dor för, dat disse Scholen dat Plattdüütsche fördern un plegen doot. Ok in de vörigen Johren hett Sleswig-Holsteen al Segels vergeven.

Dat Segel kregen hebbt de Grundschool Delve, de Grund- un Hauptschool Moisling (Lübeck), de Grundschool Mollhagen (Gemeinde Steenborg), de Realschool Wilhelm-Käber-School un de Grundschool Mühlenredder (Reinbek). Vun all de Scholen weren Lehrers, Schölers, Öllern un de Schoolrekters na Kiel kamen un hebbt de Plakett in’e Hannen kregen.