Publius Decius Mus (Kunsel 312 v. Chr.)

Publius Decius Mus († 295 v. Chr. bi Sentinum) is en Politiker in de Röömsche Republiek ween. He weer veermol röömschen Kunsel. To'n eersten Mol is he Kunsel ween in dat Johr 312 v. Chr.. 310 v. Chr. hett he as Legaten deent. As he 308 v. Chr. to'n tweeten Mol Kunsel weer, hett he gegen de Etruskers siegt. 306 v. Chr. weer Decius den röömschen Dikater Publius Cornelius Scipio Barbatus sien Magister equitum. Tohopen mit Quintus Fabius Maximus Rullianus is he 304 v. Chr. Zenser wurrn. Ok, as he to'n drudden un veerten Mol Kunsel ween is, weer Rullianus sien Kollegen. Mit em tosamen hett he de demokraatschen Maatregeln torüchdreiht, de vun Zenser Appius Claudius Caecus upstellt wurrn weern. 297 v. Chr. weer Decius to'n drudden Mol Kunsel un hett in den drudden Samnitenkrieg bi Maluentum siegt. Siene annern Siege sund (ok bi Titus Livius) nich düütlich ut'neen to holen. En Johr later is siene Herrschop verlängert wurrn um een Johr. Vun 300 v. Chr. bit an sien Dood is Decius Pontifex ween.

To'n veerten Mol is Decius Kunsel ween in dat Johr 295 v. Chr.. He hett mit Rullianus gegen de Samniten un Senonen unner Gellius Egnatius siegt in de Slacht vun Sentinum. Na dat Vorbild vun sien Vadder, de ok Publius Decius Mus heten harr, hett he sik in düsse Slacht an den Dood wieht. So schall dat ok sien Söhn 279 v. Chr. maakt hebben. Ok he hett Publius Decius Mus heten.