Rode Grütt
De Rode Grütt is ene Spiese, de sunnerlich in Noorddüütschland un in Skandinavien eten warrt. Dor weert verschedene rode Früchte mit en beten Fruchtsapp un Zucker tohopengeven. Denn kümmt dor Stärke to, oder anners wat to'n dicker maken. Fröher is de Rode Grütt mit Sago oder Grütt andickt wurrn. Dor kümmt ok de Naam vun her. Tomeist warrt Rode Grütt as Nadisch mit en beten Melk oder Rohm eten. Faken kümmt dor ok Vanillesooß mit to.
