Rodolfo Massi

Rodolfo Massi (* 17. September 1965 in Corinaldo) is en ehmalger italieensch Radrennfohrer.

Karriere

Nahdem Rodolfo Massi all as Amateur völ Rennen wunnen harr, wurr he, versehn mit groot Vorschusslorbeeren, 1987 Profi. Aber all een Johr later hett he sück en Been braken un he muss opereert wurrn, wat dorto führen dee, dat een Been en paar Zentimeter lüttger bleev. So bleev hüm blots de Upgaav as Eddeldomestike, de hüm aber ok dennoch eenig Spood inbroch.

Sien woll best Karrierejohr weer dat Johr 1998, as he sowohl de Middelmeer-Rundfohrt as ok den Giro di Calabria winnen kunn. In dat glieker Johr wunn he bi de Tour de France en Bargdeelstreck un he leeg nah de 16. Deelstreck up Platz 7 in de Gesamtwertung un führ ok de Bargwertung an. Denn aber hett man in sien Hotelzimmer Dopingmiddel funnen. He wurr vun de Polizei verhört un kunn nich mehr wieder an de Tour de France deelnehmen. He weer de eerste Radrennfohrer överhoopt, de wegen Doping in Haft nommen wurr. Later wurr he för söss Maand sparrt. In’ Peloton wurr he blots „De Aftheker“ nömmt.

Dornah speel he kien bedüüdend Rull mehr in den internatschonalen Radsport, ok wenn he 2000 noch en Deelstreck bi den Grand Prix Midi Libre winnen kunn un to’n Afsluss vun sien Loopbahn 2003 bi Giro d’Italia noch eenmal Platz 67 in de Gesamtwertung beleggen dee.

Palmarès

• 1994 Sieger: Settimana internazionale
• 1996 Een Deelstreck Giro d’Italia
• 1997 Sieger Tour du Haut-Var
• 1997 Een Deelstreck Vuelta Ciclista a la Communidad Valenciana
• 1998 Sieger: Middelmeer-Rundfohrt
• 1998 Een Dellstreck un Gesamtsieg Giro di Calabria
• 1998 Een Deelstreck Critérium International
• 1998 Een Deelstreck Tour de France
• 2000 Een Deelstreck Grand Prix Midi Libre

Weblenken

• Rodolfo Massi in de Datenbank vun Radsportseiten.net
• Rodolfo Massi Homepage (italieensch)
• Rodolfo Massi Tour de France Ergevnisse