Romeo un Julia Motiv

Een von de beröhmtesten Theoderstücke von William Shakespeare is woll de Tragödie Romeo un Julia. Dat Motiv von dat Stück is awer wat öller. In fröhe Tieden, in de Antik, is dat all bruukt worden. In de wat nie'ere Tieden hett de Italiener Masuccio in sien Novell Novellino von 1476 all 'ne ähnliche Geschicht vertellt: Dor leven sick Mariotto un Gianozza in Siena, man Gianozza schall jemand anners friegen. Wieldes sleiht Mariotto en Börger in Siena doot un warrt verbannt. Gianozza nimmt denn Gift, dat se deep inslöppt un jeder denkt, dat se doot bleven is. So bruukt se denn nich to friegen. Mariotto höört von ehrn Dood, geiht nah Gianottan ehr Gruft un warrt dor denn fastnahmen un mööt starben. Gianozza geiht donn in een Kloster un stürvt dor denn trurig. Dat gifft denn noch täämlich vääle italiensche Schriever, de dat Motiv donn upnahmen hebbt. In de „Historia novellamente ritrovata di due nobili amanti“ von 1524 hett Luigi da Porto de Handlung denn nah Verona versett. Dor leven sick donn Romeo Montecchi un Julia Cappelletti. So ähnliche Namens hett laterhen ok Fritz Reuter in sien Reis nah Konstantinopel bruukt. Nie is ok, dat dor twee Familien in Fiendschaft leven doot, un Romeo den Vedder von Julia dootsleiht. Ok hier denkt Romeo, dat Julia doot is un bringt sick denn sülven üm. Julia blifft donn awer gliek dornah doot. So hett dat donn ok Shakespeare schreven. Dat Motiv is ok in wat anner Länner to finnen, t. B. in Frankriek, England, Spanien un so wieder.

De beröhmteste Text is awer Romeo and Juliet von William Shakespeare. De hett de Tragödie woll üm 1595 rüm schreven. Dor duuert dat alls blots noch fief Daag an, wat Romeo un Julia in Verona passeert: Romeo Montague verleevt sick in Julia Capulet. Dee beeden Familien leven awer in Fiendschaft. Liekers leven sick de beeden. Bie en Striet warrt Mercutio, de Vedder von Julia denn von Romeo dootslahn. He mööt ut de Stadt weg. Julia will Romeo friegen, dorüm nimmt se ein Slapmiddel, dat ehr Familie denkt, se weer doot, un so warrt se in en Gruft bisett. Dor wull se denn egentlich Romeo wedder sehn un denn friegen. Romeo geiht nu nah de Gruft hen un denkt awer ok, dat siene Julia nich mehr levt un bringt sick üm. Julia wakt up un süht, dat ehr Romeo Gift nahmen hett. Se küsst em un kriggt so ok wat von dat Gift mit af un stürvt.

Veel Künstlers hebbt sick denn von dit Theoderstück inspireern laten, t. B. Gottfried Keller mit Romeo und Julia auf dem Dorfe von 1856. Ok in de plattdüütsche Literatur is dat Motiv to finnen, t. B. bie Fritz Reutern, de dat in sien Reis nah Konstantinopel en beten wat anners bruukt hett.