Rosskanaal

De Rosskanaal mit de Gewässer-Nr: 6890 is en rund 1.300 Meter langen Verbinnungskanaal för de Schippfohrt in’n Hambörger Haven twüschen den Rosshaven un den Köhlbrand (Stadtdeel Steenwarder). De Kanaal verlöppt parallel to de östliche Tofohrt to de Köhlbrandbrügg un den Neehöver Kanaal. De middlere Waterdeepd bi Siedwater is rund 4 Meter. De Kanaal is Anfang 1900 boot worrn. De Naam kummt von en olen Hoff Ross op Steenwarder.

Luftbild (rechts blangen de Köhlbrandbrügg de Rosskanaal)

Hachmannbrügg

Howaldtbrügg

Rossbrügg

Historie

Na’n Tollansluss von Hamborg an’n 15. Oktober 1888 is de Hambörger Haven en Freehaven mit faste un swemmen Tollgrenzen worrn. Dat de lüttjeren Schipperslüüd üm’n Freehaven rümföhren kunnen, hett dat de Mööglichkeit geven, von de Bavenelv her över de Kanaals Müggenbörger Kanaal, Tollhaven, Veddelkanaal, Ellerholtkanaal, Rosskanaal, Rugenbarger Haven un Köhlfleet na de Ünnerelv to kamen. So müssen de lüttjeren Fohrtüüg nich över de Elv föhren, op de veel Verkehr von grote Scheep weer un kunnen so na de achteren Haventofohrten kamen.

De Rosskanaal is 1900 anleggt worrn un hett de Vulkanwarft von Neehoff afsneden. Vondaag höört en groten Deel von dat Rebeed to dat Containerterminal Tolleroort.

Dat gifft veer Brüggen över den Rosskanaal: de Hachmannbrügg in’n Oosten, denn de Howaldtbrügg (Bojohr 1936) un in’n Westen de Rossbrügg (Iesenbahnbrügg un parallele Stratenbrügg Bojohr 1911) an’n Köhlbranddiek.