Rudolf II. Rühle

Rudolf II. Rühle (* um 1320 in Friedberg; † 1367) weer een Johr lang Bischop von dat Bisdom Veern.

Rudolf is üm 1320 as Söhn von den Börger Johann Rühl in Friedberg boren. As Rudolf von Friedeberg is he in de Kanzlie von Kaiser Karl IV. intreden, weer mit den Kaiser op sien Römertog 1355 un as kaiserlichen Geheemschriever op’n Rieksdag in Nürnberg 1355, op den de gröttste Deel von de gollene Bull schreven worrn is. He kreeg vör 1360 en Probstie in Wetzlar. 1366 is he as Nafolger von Gerhard II. vun Barg Bischop von Veern worrn un ut de Kanzlie utscheden. He is aver al 1367 doodbleven. He harr an’n 29. Juni 1367 in Prag sien Testament maakt. Dat Testament wiest, dat he en ganze Reeg Kapitalien un Göder harr, von de veel in siene Heimatstadt legen un eerst von em köfft worrn sünd. Na sien Dood is Hinnerk I. von Langeln Bischop worrn.