SV Ohlers/Ottendörp

De SV Ohlers/Ottendörp (hoochdüütsch Spielvereinigung Ahlerstedt/Ottendorf 1970 e.V.) is en Footballvereen ut Ohlers in’n Landkreis Stood in Neddersassen. De eerste Footballmannschop von de Froonslüüd speelt in de Regionalliga Noord. De eerste Mannschop von de Mannslüüd speelt in de Landsliga Lümborg.

Logo von’n Vereen

Geschicht

Froonslüüd

2004 sünd de Froonslüüd in de Regionalliga Noord opstegen. In de eerste Saison is de Mannschop Veerten worrn. In de Saison 2009/10 sünd se denn Drüdden worrn, wat bet nu de beste Platz weer, den se schafft hebbt. In disse Tied hett ok Lena Petermann bi Ohlers/Ottendörp mitspeelt, de denn na’n Hambörger SV in de Football-Bundsliga wesselt is.

Mannslüüd

De Mannslüüd sünd 1976 in de Verbandsliga Noord opstegen un hebbt dor twee Johr lang mitspeelt. Na’t Afstiegen hebbt se teihn Johr bruukt, bet se wedder in de Landsliga West opstegen sünd. Na een Saison is de Mannschop in de Landsliga Oost wesselt, wo se 1991 Föfften worrn sünd, wat betherto jemehr best Platz weer. Dree Johr later is de Mannschop denn bi de Ligareform in de Landsliga Lümborg indeelt worrn. In de Saison 2008/09 sünd se Meester worrn un in de Neddersassenliga Oost opstegen. Dor hebbt se den twölvten Platz maakt, sünd aver dör en Ligareform wedder afstegen. Mit Tobias Duffner un Jannik Löhden hett de Vereen twee Spelers in de 3. Football-Liga vörbröcht.

Weblenken

• Websteed von’n Vereen (hoochdüütsch)