Sabina Catharina

Sabina Catharina vun Oostfreesland oder Sabina Catharina Cirksena (* 11. August 1582 in Esens; † 31. Mai 1618) weer en Gräfin von Rietberg.

Leven

Sabina Catharina wurr as öldst Kind vun Enno III. (Huus Cirksena) un de sien eerst Fru Walburgis in Esens boren. An‘n 7. Oktober vun dat Johr wurr se dort döfft. In den Berumer Vergliek an‘n 28. Januar 1600 wurr dat Arv vun Enno III. ünner Sabina Catharina un hör Süster Agnes updeelt, wiel sück de Vader nee verheiraten wull. Sabina Catharina kreeg de Grafschap tospraaken.

Sabina Catharina hett 1601 hör Unkel Johann III. heiraadt De wegen de eng Verwandschap nödige päpstliche Dispens weer an’n 13. April 1600 geven wurrn. An‘n 3. März 1601 wurr en Eheverdrag slooten, an den Dag dornah hett de Abt Leonhard Ruben vun Abdinghof in de Rietberger Slottkapell de Trooung in’n tridentinischen Ritus slooten. Noch vör de Hochtiet is dat Paar to’n kathoolschen Glooven konverteert un hett dissen weer in de Grafschap inführt.

1618 hett dat Ehepaar den Grundsteen to dat Franziskanerkloster in Rietberg leggt. 1629 wurr de Grünnensoorkunn vun dat Kloster utstellt.

Sabina Catharina is an’n 31. Mai 1618 bi de Gebort vun hör elft Kind storven. De Sarg wurr in de Slottkapell bisett un vun twee hollansch Mürker inmüürt. Nah hör Dood wurr Sabina Catharina as en Hillige verehrt. De Hoochaltar in dat Franziskanerkloster drocht hör to Ehren dat Patrozinium Hl. Katharina.

Nahkommen

Tosommen mit Johann III. harr Sabina Catharina elf Kinner:

Edzard (* 2. Juni 1602; † 28. März 1603), begraven in daz Kloster Marienfeld
Anna Walburgis (* 27. Oktober 1603; † 29. November 1604), begraven in dat Kloster Marienfeld
Catharina Maria (* 28. Oktober 1604), vör 1623 verheiraadt mit Marquis von Warenbon
Ernst Christoph (* 1. April 1606; † 31. Dezember 1640), 1625–1640 Graf von Rietberg, verheiraadt mit Albertine Maria Marquise de St. Martin, kaiserlicher Viezmarschall
Enno Philipp (* 23. März 1608; † 14. März 1636), Domherr to Köln, Straßburg un Patterbuorn
Leopold (* 23. November 1609; † 14. November 1635), Domherr to Köln, Straßburg un Patterbuorn
Walburgis Maria (* 8. Mai 1612; † 13. Juni 1613), begraven in dat Kloster Marienfeld
Ferdinand Franz (* 4. Oktober 1613; † 27. Juni 1648), Domherr to Köln, Meideborg, Straßburg un Halberstadt
Clara Sophia (* 7. März 1615)
Anna Clara (* 30. Mai 1616)
Johann IV. (* 31. Mai 1618; † 7. August 1660), Graf von Rietberg

Weblinks

[1]