Sankt Joost (Wangerland)

Sankt Joost is en Dörp in’t Wangerland.

De Kapell kummt 1497 toeerst in de Oorkunnen vör. Se höör de Junkers vun Hodens un Maisidden to. De Kark ut Tegelsteen is as Saalbo boot wurrn un harr toeerst en Flackdack. Ehr Walmdack hett se in de twete Hälft vun dat 18. Johrhunnert kregen. De Toorn mit de Klock staht en beten af vun de Kark un is wat scheef. Vun 1542 af an weer Sankt Joost denn en egen Kaspel, dat nich mehr to dat Kaspel Hohenkarken tohöör. De Karkenböker sünd vun 1658 af an nableven. Twischen Kark un Toorn steiht en Denkmal för de söss fullenen Suldaten ut’n eersten un twölv fullenen Suldaten ut’n tweten Weltkrieg. De Orgel stammt vun den Orgelboer Gerhard Schmid.

Bi de Wiehnachtsfloot 1717 sünd in Sankt Joost, na dat, wat Pastoor Janßen in Neuende opschreven hett, 71 Lüüd un veel Veeh verdrunken.

Vör 1858 höör Sankt Joost to dat Amt Minsen, denn to dat Amt Jever. 1909 hebbt se de Karkengemeen Sankt Joost mit de vun Wüppels tosamenleggt.