Santander
Santander (spaansch: [[santan'deɾ]]) is de Hööftstadt van de to Spanien hörrn Autonome Gemeenschap Kantabrien in‘n Norden van de iberisch Halfinsel. Över en Drüddel van de Kantabrier leven in Santander. De Universitätsstadt hett 171.951 Inwahner (Stand 1. Januar 2017) up en Rebeet van 34 km² un is en anseggten Badeoort.
Geschichte ännern
To Tiet van dat Röömsch Riek droog de Stadt de Naam Portus Victoriae Iuliobrigensium. De hüüdig Naam leit sück af van den fröhchristlichen Merteler Emeterius (Sancti Emetherii > Sancti Emderrii > Sancte Endere > Santendere > Santanderio > Santander), de sien Kopp de Legende nah in dat 3. Johrhunnert nah Santander brocht wurr. 1187 hett Alfons VIII. van Kastilien den Abt van San Emeterio to’n Vörsteher van de Stadt nömmt. 1248 nehm Santander an de Eroberungsslachten van Sevilla deel un kreeg as Dank dorför en eegen Stadtwappen, dat de Biller van den Torre del Oro un den Stroom Guadalquivir in Sevilla enthollt.
Santander weer en wichtig Habenstadt för Kastilien in dat laat Middelöller un denn ok för den anfangen Hannel mit de Nee Welt. De offiziellen Stadtrechte kreeg Santander in dat Johr 1755.
An‘ 3. November 1893 is de in Brand geraden Frachter Cabo Machichaco mit 51 Tünnen Dynamit an Bord in den Haben van Santander utnannerflagen. 590 Lüüd keemen dorbi to Dood, 525 wurrn besehrt. Ok dicht bi liggen Hüüs gungen in Dutt.
Dat groot Füer van 1941 ännern
Santander wurr 1941 Opfer van en gewaltig Füer; dat gung van de Calle Cádiz dicht bi de Habenmolen ut, stark Südwind hett den Brand immer weer in Gang sett un wurr so in de Stadt dreeven. Twee Daag lang hett dat Füer togang ween. Blots en Füerwehrmann keem bi sien Insatz to Dood, aber Duusende van Familien harrn kien Huus mehr, wat en Chaos mit sück brocht. De historsch Stadtkarn van Santander gung in Dutt. Dor hör ok de gootsch Kathedrale to, de man aber weer rekonstrueert hett. Der Wedderupbo hett de Stadt tegenöver fröher deelwies düchtig verännert.
Wat antokieken sück lohnt ännern
Dör den Brand van 1941 gifft dat meest kien historsch Bowarken mehr, mit Utnahm van de wedder upricht Kathedrale, in de de Gebeenen van de beid Hilligen Emeterius un Celedonis, de Schuulpatronen van de Stadt, upbewohrt wurrn. Dor gifft dat noch en Prähistorsch Museum un en Maritim Museum.
