De Sassendre’er is een vun de bekanntsten Breefmarken vun Düütschland. Se is al an’n 29. Juni 1850 rutgeven worrn, hett aver eerst an’n 1. Juli 1850 gellt. De amtliche Beteken vun de Breefmark is Sassen, Dree Pennen root.

De Sassendre’er

Dat weer de eerste Breefmark vun’t Königriek Sassen. Dacht weer se för’t Freemaken vun Druckwarken, vör allen Daagblööd, in’t Striepenband. Tyypscherwies weer de Breefmark elk to’n Halfpart op dat Striepenband un op de Druckwaar backt, dat dat Daagblatt nich dörrutschen künn. Bi’t Afmaken vun dat Band, woneem de Adress opstünn, sünd de Breefmarken faken tweigahn. Veel Marken sünd dorüm nich bit hüüt erhollen bleven. Ehr Bekanntheit kummt vun tallriek Geschichten vun ehr deelwies aventüerlichen Opdecken un faken is se ok namaakt worrn. In’n Michel-Kataloog warrt de Weert vun den Sassendre’er na Klöör mit 4.000 bit 18.000 € angeven.

De Breefmark is in’t Bookdruckverfohren dör de Druckeree J. B. Hirschfeld ut Leipzig mit en Gesamtoplaag vun 500.000 Stück maakt worrn. De Bestand is in acht Oplagen op 25.000 Bagens to fief mol veer Breefmarkens rutgeven worrn. Offiziell sünd dorvun 463.118 Stück verköfft worrn, de Rest is opbött worrn. Offiziell gell de Sassendre’er bit to’n 31. Dezember 1867.